سیالکوٹ۔ 13جون (اے پی پی) وزیراعظم نا خصوصی کمکار امور نوجوانان محمد عثمان ڈار پارینے کہ سیالکوٹ اٹی شونداری کاریم تا جال اس تالان کننگ اُن، وزیراعظم عمران خان نا ویژن نا رداٹ ”کلین گرین سیالکوٹ“ نا شاری تے ساف کنوئی آ دیر انا ڈٹ انا بناءِ کرینن و پیپ لائن شاغنگ نا کاریم ترندی اٹ برجاءِ۔ سیالکوٹ نا الس نا ویل آک ترندی اٹ ایسر مننگ ءُ۔ داخیال آتا درشانی ءِ او وزیراعظم نا خصوصی کمکار امور نوجوانان محمد عثمان ڈار ”شونداری ڈٹ خراج تروک آتا پن“ نا چرجوئی ءِ برجاتخسا خراج نادہندہ شیخ نوید اقبال چیئرمین ڈرائی پورٹ آن سبلائم چوک آن وزیر آباد روڈ اسکان برجا اسٹیٹ آف دی آرٹ سیوریج سسٹم ڈٹ انا بناءِ کننگ نا وخت آ میڈیا تون گپ وتران اٹی کرے۔ دودانا مہمان خاص خراج دہندہ شیخ نوید اقبال خصوصی کمکار عثمان ڈار تون اوار سیوریج سسٹم نا بنداوءِ تخا۔ ہرانا خڑچ 141.31ملین ءِ۔ داوخت آ بریگیڈیئر(ر) محمد اسلم گھمن، بیرسٹر جمشید غیاث، خاور انور خواجہ، ضلعی راہشون عامر ڈار، پاکستان تحریک انصاف سٹی ڈسٹرکٹ کارپوریشن نا سیکرٹری حوالکاری وشینکاری میاں اعجاز جاوید، میاں سرمد محمود، ملک زاہد، چوہدری نوید سلطان، قمر منیر سلہری، سید عمیر، محمدعلی چوہدری، میاں وسیم و ایلوفک ہم ساڑی ئسر۔
