تاریخ گواہ ءِ آجوئی و حریت نا تحریک آتے اسُل ظلم و جور اٹ توننگ مفک، سردار مسعود خان

اسلام آباد۔ 13(اے پی پی) آزاد جموں و کشمیر نا صدر سردار مسعود خان پارینے کہ دنیا نا تاریخ گواہ ءِ کہ آجوئی و حریت نا تحریک آتے اسل ظلم و جور اٹ توننگ مفک۔ تاریخ نا داہم سبخ ارے کہ انصاف خواہوک آ توار تے واک انا کمک اٹ چپ کرفوک آ ریاست آک زیات ہرے اسکان تینا وجود ءِ برقرار تخنگ کپسہ۔ بھارت تینا پن انا جمہوری و سیکولرازم نا لویس ءِ تینا دوتے اٹ تارتار کرسا اسہ فسطائی ریاست نا حیثیت اٹ مون آ بسنے۔ یک شنبے نادے آ تینا اسہ خصوصی بیان اسے ٹی مقبوضہ کشمیر اٹی کوزہ گیر بھارتی فوج انا دوتے اٹ سوپور خلق اٹی مسہ ورناتا شہیدی نا مذمت ءِ کرسا صدر سردار مسعود خان پارے کہ دا ورناتا نماز جنازہ ٹی غٹ پابندی و اڑاند آتیان پد ہم ہزار آ بندغ آتا بشخ ہلنگ دا ہیت انا شاہدی ءِ کہ بھارت کورانگا ریاستی جور آن پد ہم کشمیری الس پورو واک اتون جموں و کشمیر نا تحریک آجوئی تون سلوک ءُ۔ بھارتی جنگی مشین نا مون آ سینہ سپر مرسا تینا جان تے ندرکروک آ داورناک بھارت ءِ پیدوار کلہو تننگ ءُ کہ نا جور انا غٹ چم آک بے سہب مریرہ و ننا تینا لمہ وطن نا آجوئی نا عزم سرسہب مریک۔ انتئے کہ نن سچ اتون سلوک اُن و نا جور انا دروغ انا سلطنگ ناانصافی آ سلوک ءِ۔