لاہور۔ 13جون (اے پی پی) پنجاب نا پوسکن آ بروک آ بجٹ الس دوست و کاروباری تپہ کن سازگار مریک۔ بجٹ اٹ السی راجی آسراتی نا چندی ڈٹ آتون صنعت کارآتیکن خصوصی پیکج نا پڑو ءِ کننگک۔ محکمہ خزانہ نا حوالی نا رداٹ پنجاب نا بجٹ بزغر، مزور و سرکاری ملازم غٹ اکن مستائی اس اتیک۔ بجٹ اٹ سویلی پنجاب تون اوار غٹ پسماندہ ضلع غاتے ٹی السی گرج آتا رداٹ پروگرام اوار کننگانے۔ ورناتے کن تربیت وکاروبار نا وارخواہی، کم وسیلہ بندغ و بے اُرابندغ آتے کن ہاؤسنگ اسکیم ولاہور کن ساف دیر و واپاری انفراسٹرکچر نا میگا پروجیکٹ آک اوار مریرہ۔ مواصلات نا شاندار ڈٹ زرگزرانی سرجزآتے ٹی ودکی و صوبہ ٹی نقل و حرکت اٹ آسانی ءِ پک کیک۔ پنجاب نا بروک آ بجٹ زرگزرانی شونداری نا بجٹ مریک ہراٹی شونداری پروگرام و ریکارڈ فنڈ مہیا کننگک۔ جان جوڑی کن جتا بجٹ دسمبر 2021اسکان پنجاب نا 100 درسد آبادی ءِ ہیلتھ انشورنس نا آسراتی مہیا کیک۔ مدر اینڈ چائلڈ ہیلتھ ہسپتال و تحصیل و ضلع نا کہول آ ہسپتال آتے ٹی ساڑی مفروک آسراتی تا فراوانی و چناتے کن کارڈیک ہسپتال نا پڑو ءِ کننگک۔ پنجاب حکومت پنجاب نا ہر ضلع ٹی کم از کم اسہ یونیورسٹی اسے نا جوڑ کننگ ءِ پک کننگ ءِ ہندارداٹ بجٹ اٹ چندی ضلع غاتے ٹی یونیورسٹی تا جوڑ کننگ کن فنڈ جتا کننگانے۔
