کلبھوشن یادیو کیس اٹی جہانی عدالت انصاف نا پرمان تیا عمل کننگ اُن، وزیر خارجہ

ملتان۔13جون (اے پی پی) وزیر خارجہ مخدوم شاہ محمود قریشی پارینے کہ بھارتی جاسوس کلبھوشن یادیو نا مقدمہ ٹی نن جہانی عدالت انصاف نا پرمان تیا و سلاہ و سوج آتیا عملدرآمد کننگ اٹی اُن۔ یک شنبے نادے آ ملتان اٹی میڈیا تون گپ وتران کرسا اوپارے کہ کلبھوشن یادیو نا کیس ءِ مسلم لیگ (ن) بگڑیفیسس۔ اپوزیشن دابابت ناسمجھی نا بایدے شاہدی ءِ ایتے و بھارت نا چم آتے پہہ مرے۔ بھارت تو خواہک کہ نن کلبھوشن یادیو ءِ قونصل رسینگ تفن تانکہ او دُوارہ ننے جہانی عدالت انصاف اٹ چکنگ کے۔ اسہ سوج اسے نا ورندی ٹی اوپارے کہ سی آئی اے نا سروک نا دورہ نئے اولیکو ئس و نئے اودیم ئس۔ داوڑنا دورہ مرسا کیک کاہک و جہانی دہشت گردی تون مون تننگ کن سلابت نا چرجوئی برجاسلک۔ پیپلزپارٹی نا راہشون خورشید شاہ نا مار انا دزگیری نا بابت سوج انا ورندی ءِ ترسا وزیر خارجہ پارے کہ احتساب نا عمل برجاءِ۔ حکومت انتقامی سیاست آ یخین تخپک۔ اگہ اوبے گناہ ءِ تو اونا برخلاف کارروائی مفک۔ کانود غٹ اکن بریبر ءِ۔ وزیراعظم عمران خان پیدوار وڑاٹ پارینے کہ نئے او کس اسے نا زور اٹ بریک و نئے کس اسے این آر او ایتک۔ دفاعی بجٹ نا بابت احسن اقبال نا بیان آ اوپارے کہ احسن اقبال بجٹ نا کتاب ءِ خوانا و نئے تقریر ءِ بِنگ۔ اودے مرے کہ بیان تننگ آن مست بجٹ نا کتاب ءِ تو خوانوسس۔ اوپارے کہ وزیر خزانہ پیدوار وڑاٹ پارینے کہ حکومت منی بجٹ نا ہچ ءُ ارادہ اس تخپک۔