فیصل آباد۔ 13جون (اے پی پی) وزیر مملکت حوالکاری و شینکاری فرخ حبیب پارینے کہ مسلم لیگ (ن) ملک ءِ خواتہ مننگ نا خڑک آ ہلا و ہراتم اقتدار ءِ سنبھالان تو تحریک انصاف نا حکومت ءِ بے شمار چیلنج مون تروک ئسر۔ زرگزران نا دا حال ئس کہ زرمبادلہ نا کوڑیک بیرہ 15دے انا ئسر، ترسیلات زر، ایکسپورٹ، کشاری پیدوار مفننگ نا بریبر ئسر ولے حکومت عمران خان نا کماشی ٹی ایلو چیلنج آتون کورونا دین انا چیلنج تون ہم سرسہبی اٹ مون تس، قوم اتون ہراوعدہ غاتے کریسن کہ بجٹ الس و کاروبار دوست وپاکستان اٹ رہینگوک آ ہرتپہ کن ریلیف بجٹ اس مریک، اودے پورو کرین وخت اس کہ دونیم کروڑ پاکستانی تے سرسہب پاکستان پروگرام نا کمک اٹ ہرفنگ والااُن ہراگیم چینجر اس جوڑ مریک، 900ارب نا پی ایس ڈی پی ٹی آبی کوڑی تیکن پیسہ و سندھ، بلوچستان، کے پی کے، گلگت بلتستان کن بجٹ اٹ فنڈتخنگانے ہنداوڑ نن این ایف سی ایوارڈ ءِ ودفسا 3412ارب کرینن ہراٹی صوبہ غاتے بھلو بشخ اس فراوان کننگ اُن، داسہ صوبہ غاک ہم صوبائی فنانس ایوارڈ نا پڑو ءِ کیر، ہراسٹ ءِ گروتھ نظر بننگ ءِ اگہ بفننگ ءِ تو بلاول م، شہباز و اپوزیشن ءِ نظر بفننگ ءِ انتئے کہ اوفتا کرپشن و منی لانڈرنگ نا گروتھ سلیسونے، داکان بیدس کبینی ءِ اخس ءِ ودوئی ئس ودا داسہ اوانا کم مننگ نا چرجوئی بناکرینے۔ یک شنبے نادے آ سرکٹ ہاؤس فیصل آباد اٹی پریس کانفرنس کرسا اوپارے کہ ہراتم مسلم لیگ (ن) نا حکومت چٹا تو ملک خواتہ مننگ نا خڑک آ ئس ولے نن غٹ مشکل حالیت و چیلنج آتا جوانمردی اٹ مقابلہ ءِ کرین۔ اوپارے کہ سمندرپارپاکستانیک بھلو کچ اسے ٹی ترسیلات زر پاکستان آ مون تسر ہراڑآن ملک ءِ بھلو سیبو اس ملا۔ اوپارے کہ ننا اقتدار ءِ سنبھالنگ نا وخت آ چیلنج آتا انباراس ئس و زرگزران نا داحالیت ئس کہ ریزور 15دے انا ئس ولے نن ایلو چیلنج آتون کورونا دین انا چیلنج اتون ہم سرسہبی اٹ مون تسن۔ اوپارے کہ نن غٹ صوبہ غاتا اوفتا حق ءِ تسونن و این ایف سی ایوارڈ ءِ ودفسا 3412ارب کننگانے ہنداخاطرآن داسہ صوبہ غاتے ہم مرے کہ صوبہ غاک ہم صوبائی فنانس ایوارڈ نا پڑو ءِ کیر۔ فرخ حبیب پارے کہ عمران خان نا نیت صاف ئس ہنداخاطرآن او غٹ تر چیلنج آتا مقابلہ ءِ کرے و کوویڈ تون مون تس حالانکہ کوویڈ۔ 19نا سوب آن بھارت منفی 7.7، بنگلہ دیش، ترکی تون اوار بھاز انگا ملک آتا زرگزران کچ اٹ مس ولے ننا زرگزران بڑزآ ہنا۔ اوپارے کہ چانڑدہ ءُ نیم ارب روپئی موسمیاتی بدلی نا ڈٹ آتے کن تخنگانے۔ اوپارے کہ پرائمری بیلنس اٹ اگہ سود ءِ کشنگے تو ننا خڑچ و کٹیا خڑک خڑک ءِ انتئے کہ ننے 3ہزار ارب وام تا قسط ادا کروئی تمنگ ءِ ہرافتے مسکوہی حکمرانک ہلکر۔ اوپارے کہ فی کس کٹیا ٹی ہم ودکی مسنے۔ وزیر مملکت پارے کہ بیدس اپوزیشن آن غٹ ءِ بجٹ جوان لگنگ ءِ ہراٹی تنخواہ دار تپہ غاہچ ءُ خراج اس خلنگتنے و تنخواہ و پنشن اٹی 10درسد ودکی و مزور نا کم آن کم اجرت 20ہزار مقرر کننگا۔ اوپارے کہ بجلی نا نہاد آتے ٹی ودکی کننگتو و احساس پروگرام اٹ 34درسد ودکی کرسا اودے 210ارب آن 260ارب آ ایسونن و اسہ کروڑ مخلوق اسکان داپروگرام سرمسنے وخت اس کہ پوسکن آ غربت سروے ٹی حقدار مخلوق ہم اوار مسنے۔
