اسلام آباد۔ 13جون (اے پی پی) وزیراعظم نا نمائندہ خصوصی مذہبی ہم آہنگی و دے ٹک نیامی و پاکستان علماء کونسل نا چیئرمین حافظ محمد طاہر محمود اشرفی پارینے کہ سعودی عرب نا کنڈآن حج انا فیصلہ نا پورو تائید ءِ کینہ، کورونا نا بدل مروک آ حالیت آتا سوب آن داجوان و سہی ءُ فیصلہ اسے۔ سعودی سرکڑدہ و الس مدام حج و زائر آتا خذمت ءِ کریر، شریعت اسلامیہ اضطراری حالیت اٹ داوڑنا فیصلہ غاتا موکل ایتک۔ داہیت ءِ او نجی دورہ غا سعودی عرب آ روانہ مننگ نا وخت آ میڈیا تون گپ وتران کرساپارے۔ حافظ طاہر محموداشرفی پارے کہ حج اسہ فریضہ اسے ہرادے وس اتون گنڈنگانے، وس اٹ سفر نا، امن، جان جوڑی، سفری خڑچ و اہل وعیال تون خڑچ آتا پورو مننگ ءِ۔ ساڑی حالیت آتے ٹی کورونا دین انا سوب آن سفراٹی ہم مشکلات ءِ و جان جوڑی نا احوال ہم قابل اطمینان اف ہنداخاطرآن سعودی عرب نا حکومت دنیائے اسلام نا مذہبی سرکڑدہ غاتا سلابت اٹ ہرا فیصلہ ءِ کرینے او ستاکڑزک و حکومت پاکستان، دارالافتاء پاکستان، پاکستان علماء کونسل تون اوار غٹ مکتبہ فکر انا عالم دین و مشائخ آک اونا تائیدءِ کیرہ۔ اوپارے کہ ساڑی حالیت آتے ٹی 60ہزار حاجی تیکن بست وبند کننگ ہم سعودی حکومت نا گچین کارنامہ غاتیان اسٹ مریک۔ اسہ سوج اسے نا ورندی ٹی حافظ محمد طاہر محمود اشرفی پارے کہ پاکستان نا وزارت مذہبی امور و سعودی عرب نا وزارت حج وعمرہ نا نیام اٹ رابطہ ارے و سعودی عرب مدام حاجی زائر آتا معاملہ ٹی امت مسلمہ نا سرکڑدہ و اسلامی ملک آتے پت اٹ ہلسافیصلہ کرینے۔ اسہ پین سوج اسے نا ورندی ٹی حافظ محمد طاہر محمود اشرفی پارینے کہ سعودی عرب نا کمک اٹ پاک اوغان علماء کونسل قطعی وڑاٹ اوغانستان نا فریق اسے نا مخ تفی یا مخالفت کن آخا بلکن اوغانستان اٹی امن کن ئس۔سعودی عرب و رابطہ عالم اسلامی امت مسلمہ ویل و دنیاٹی امن کن مدام کڑد ادا کیک و اوغانستان نا امن پاکستان و داڈیہہ نا امن ءِ۔ سعودی عرب و پاکستان نا اسہ ہی خواہش ءِ کہ دا ڈیہہ ٹی داسہ وہوک آ دتر بند مرے۔ اسہ پین سوج اسے نا ورندی ٹی حافظ محمد طاہر محمود اشرفی پارے کہ سعودی عرب و پاکستان نا نیام اٹ مری ودی کروک آتا سازش بے سہب مس۔ اینو پاکستان، سعودی عرب مچ آ عالم اسلام، عالم عرب آن تدوک آ دہ سال آن زیات خڑک ءُ و ہندا وزیراعظم عمران خان نا پالیسی و سوچ ءِ۔
