اپوزیشن پارلیمنٹ نا تہہ ٹی و پیشن منفی سیاست کننگ ءِ، ملک وقوم انا خذمت نا مشن ءِ سرسہبی اٹ برجاتخنہ، شاہ محمود قریشی، اسد قیصر

لاہور۔ 12جون (اے پی پی) گورنر پنجاب چوہدری محمد سرور تون اسپیکر قومی اسمبلی اسد قیصر و وزیرخارجہ شاہ محمود قریشی اس تتون اوار قومی اسمبلی نا باسک آک ہفتہ نادے آ داڑے گورنرہاؤس اٹی اوڑدہی کریر۔ داوخت آ بنجائی بجٹ، سیاسی و حکومتی امور تون اوار ایلو باندات آتا بارواٹ گپ وتران کننگا۔ گورنرپنجاب الس دوست بنجائی بجٹ آ وزیرخارجہ، اسپیکر قومی اسمبلی و اسمبلی نا باسک آتے مبارکبادی تس۔ پنجاب نا صوبائی وزیر انرجی ڈاکٹر اخترملک، وزیراعظم نا خصوصی کمکار ملک عامر ڈوگر و ایم این اے زین قریشی اس تتون اوار ایلوفک ہم داوخت آ ساڑی ئسر۔ اوڑدہی ٹی گورنر پنجاب چوہدری محمد سرور، وزیرخارجہ شاہ محمود قریشی و اسپیکر قومی اسمبلی ئسک داعزم انا درشانی ءِ کریر کہ حکومت و سیوتی جماعت آک اواری اٹ آسانی اٹ بنجائی بجٹ ءِ منظور کرفنگ اٹ سرسہب مریرہ و مخالفت آتے شکست تون مون تروئی تمک۔ اوپارے کہ بدبختی اٹ اپوزیشن جماعت آک بنجائی بجٹ نا حساب وکتاب ءِ خواننگ آن بیدس اوڑآ تنقید کننگ ءُ۔ اوپارے کہ ہرمعاملہ غا سیاست کننگ مخالف آتا عادت جوڑ مسنے، اوفتے مرے کہ اوتنقید کننگ نا جاگہ غا راستکی تے مون آتخسا ہیت کیر۔ اوپارے کہ تحریک انصاف نا حکومت السی است خواہی تا رداٹ سیاست کننگ ءِ و بجٹ اٹ الس ءِ ہربشخ اٹ ریلیف تننگ دانا شاہدی ءِ۔ اوپارے کہ الس دوست بجٹ پیش کننگ آ وزیراعظم عمران خان و اونازرگزرانی ٹیم مبارکباد نا حقدار ءِ۔ وزیرخارجہ شاہ محمود قریشی پارے کہ عمران خان ملک ءِ سہی کنڈا دننگ ءِ ہرادے اپوزیشن سگپننگ ءِ۔ اوپارے کہ اپوزیشن پارلیمنٹ نا تہہ ٹی و پیشن منفی سیاست کننگ ءِ ہرادے الس خننگ ءِ۔ اوپارے کہ مہالو ہم تحریک انصاف نا حکومت نا بجٹ منظور مس داسہ ہم مریک۔ اسپیکر قومی اسمبلی اسد قیصر پارے کہ وزیراعظم عمران خان نا ہچ ءُ ذاتی ایجنڈااس اف او ملکی شونداری و سوگوی خواہک۔ اوپارے کہ او ملک وقوم اکن خذمت نا مشن ءِ سرسہبی اٹ برجاتخک۔