اسلام آباد۔ 12جون (اے پی پی) وزیر مملکت حوالکاری وشینکاری فرخ حبیب پارینے کہ بیدس اپوزیشن آن ملک اٹی رہینگوک آ ہرتپہ مالی سال 2021-22ءِ الس، کاروبار دوست و بریبر ءُ بجٹ اس گوندانو، بلاول و شہباز شریف تینا سرکڑدہ ئی ٹی بجٹ تقریر اٹی ہڑدڑ و ہلڑبازی کرفسا کریر۔ بے کچ اہم وخت آ الس نا گچینی و ملک انا شونداری نا بابت بجٹ نا اسہ لوز اس ہم بنتور،داسہ سٹی ءُ تیر خلپس، مزور، تنخواہ دار تپہ، صنعت کار، بزغرغٹ دانا ستاءِ کرینو۔ ہفتہ نادے آ بلاول زرداری نا بیان آ ردعمل و تینا ٹویٹ اٹی وزیر مملکت فرخ حبیب پارے کہ وزیراعظم عمران خان 40آن 60لکھ اُراتے تینا نت تیا سلفنگ کن سرسہب پاکستان پروگرام نا بناءِ کرینے، ہرانا رداٹ ہراُراءِ کاروبار کن 5لکھ بیدس سود وام فراوان کیک۔ کشار گر ءِ ہرفصل اکن بیدس سود 1.5لکھ، مشینری 2لکھ وام بے سود فراوان کننگک۔ اوپارے کہ وزیراعظم عمران خان ءِ اختہ مروک آ تپہ غاتا احساس ارے، ہنداخاطرآن احساس کیش پروگرام، سالانہ 50ہزار احساس انڈرگریجویٹ اسکالرشپس، لنگرخانہ، ہنکین جوڑ کرے۔ اونا پارت آتیا احساس پروگرام اٹ 210ارب ءِ ودفسا 260ارب کننگانے ہراکہ 24درسد ودکی ءِ۔ اوپارے کہ تنخواہ ہلوک آڑا ہچ ءُ پوسکن ءُ خراج اس اف، کم آن کم اجرت 20ہزار مقرر کننگا۔ اوپارے کہ ودہولڈنگ خراج 40 درسد اسکان کم سیلز خراج و فیڈرل ایکسائز خراج اٹی ہم ریلیف فراوان کننگا، 850سی سی اسکان نا گاڈی تیا فیڈرل ایکسائز خراج ختم و سیلز خراج ءِ کم کرسا 12.5درسد و VATءِ چٹفنگا، ودہولڈنگ خراج ءِ بینکاری لین دین، اسٹاک ایکسچینج، ٹریولنگ، موبائل فون(کمی) معدنیات، کریڈٹ کارڈز آن چٹفنگا، آئل فیلڈ و سیل و سوات نا بشخ اٹی ودہولڈنگ خراج اٹ کمتی کننگا۔ وزیر مملکت حوالکاری وشینکاری فرخ حبیب تینا ٹویٹ اٹی پارے کہ الحمداللہ وزیراعظم عمران خان نا نیت صاف ءِ اللہ تعالیٰ نا کنڈآن برکت بننگ ءِ۔ اپریل 2021اٹی بھلا صنعت (LSM)نا پیدوار اٹی 68درسد ودکی مس۔ جولائی آن اپریل 2021اولیکو 10تُواٹی 12.84درسد ودکی مسنے۔ اوپارے کہ پاکستان نا زرگزران، ایکسپورٹ و پیدوار نا بنداو آ پائیدار شونداری کننگ ءِ۔
