حکومت بنجائی بجٹ اٹ کوہسار ٹورزم ہائی وے کن اسہ ارب 75کروڑ روپئی جتا کرینے، صداقت علی عباسی

اسلام آباد۔ 12جون (اے پی پی) حکومت بنجائی بجٹ اٹی کوہسار ٹورزم ہائی وے کن اسہ ارب 75 کروڑ روپئی جتا کرینے، کوہسار ٹورزم ہائی وے سیل و سوات انڈسٹری کن اسہ مزل نا حیثیت اس جوڑ مریک و ڈیہہ کوہسار کن گیم چینجر ڈٹ اس جوڑ مریک، بنجائی حکومت نا پڑوکروک بجٹ 2021-22ء ٹی پی ایس ڈی پی نا بشخ مروک آ کوہسار ٹورزم ہائی وے تحصیل راولپنڈی، تحصیل کلرسیداں، تحصیل کہوٹہ، تحصیل کوٹلی ستیاں و تحصیل مری ءِ اسہ ایلوتون ملفک، 4 ارب نا خڑچ آن جوڑ مروک آ دا ڈٹ اٹی 26فٹ مرغن 123کلومیٹر روڈ دا ڈیہہ کوہسار و ڈیہہ پوٹھوہار ءِ اسہ ایلو تون ملفک ہراڑکن اسہ ارب 75کروڑ روپئی دمدستی جاری کننگ نا فیصلہ کننگانے۔ داخیال آتا درشانی ءِ حلقہ این اے57آن گچین مروک آ پاکستان تحریک انصاف نا باسک قومی اسمبلی صداقت علی عباسی پوسکن آ مالی سال اکن بنجائی بجٹ نا بابت تینا اسہ گپ وتران اسے ٹی کرینے۔ اوپارے کہ وزیراعظم پاکستان عمران خان نا ساڑی آ دورہ مری ٹی داٹورزم کاریڈور نا اہمیت آ زور شاغاسس و پوسکن آ سیل وسواتی ہند آتا مون آ دننگ اٹ داسڑک نا ممکنہ کڑد ءِ ادا کرے۔ اونئے بیرہ داآئیڈیاءِ پسند کرے بلکن بجٹ میٹنگ اٹ وار وار داڈٹ انا ذکر ءِ کرے۔