راولپنڈی۔ 12جون (اے پی پی) جاڑ انگا شار تا پوریاگر راہشونک بنجائی بجٹ ءِ متوازن گوندسا الس آ ہچ ءُ پوسکن ءُ خراج اس خلپننگ نا فیصلہ نا ستاءِ کرینو۔ راولپنڈی چیمبر آف کامرس نا صدر محمد ناصر مرزا اے پی پی تون گپ وتران کرسا پارے کہ بادی النظر اٹ بجٹ متوازن ءِ، خراج کٹیا تا 5800ارب روپئی نا ہدف پوسکن آ خراج گزار جوڑ کرسا ہی دوئی مننگ کیک۔ اوپارے کہ کسٹم ڈیوٹی نا مد اٹی چل ءُ دو ارب روپئی نا ریلیف ستاکڑزک،۔ آئی ٹی نا کمک اٹ خراج کولیکشن، آڈٹ آن انسانی نیام تم اٹ کمتی بریک۔ سیلز خراج ریٹیلرز آتے کن آسودہی و انعام کون آ گام گیج آن پوسکن آ خراج گزار اٹی ودکی مریک۔ سیلز خراج و فیڈرل ایکسائز ڈیوٹی ٹی گچین گام گیج کننگانے ایس ایم ایز کن ٹرن اوورخراج نا حد مسہ ملین آن ودفسا دہ ملین کننگ نا گام گیج نا ستاءِ کینہ۔ ودہولڈنگ خراج نا کچ ہفدہ غان دُوانزدہ درسد کننگ ستاکڑزک۔ انجمن تاجران کمرشل مارکیٹ نا وائس چیئرمین حماد قریشی، سید شاہد علی شاہ جی و جنرل سیکرٹری ساجد قریشی بجٹ آ ردعمل ترسا پارینو کہ بنجائی بجٹ متوازن ءِ ہراٹی الس آ ہچ ءُ پوسکن ءُ خراج اس خلنگتنے، پوریاگر برادری نا خواست آ 5لکھ روپئی بے سود وام تا پڑو ستاکڑزک۔
