اسلام آباد۔ 06 مئی (اے پی پی) بنجائی وزیر خزانہ و محصولات شوکت ترین پارینے کہ حکومت پائیدار شونداری کن چنکا و نیامئی درجہ نا کاروبار نا بشخ (ایس ایم ایز) آ چکار کننگ ءِ۔ اوداہیت ءِ پنچ شنبے نادے آ داڑے بنجائی وزیر صنعت و پیدوار مخدوم خسروبختیار تون ایس ایم ایز کن وام تا پوسکن آ اسکیم نا خصوصیات آ میٹنگ اٹی پارے۔ وزیراعظم نا خصوصی کمکار محصولات ڈاکٹر وقار مسعود ہم داوخت آ ساڑی ئس وخت اس کہ گورنر اسٹیٹ بینک رضاباقر ویڈیو لنک انا کمک اٹ دیوان اٹی بشخ ہلک۔ گورنر اسٹیٹ بینک وزیر خزانہ ءِ چنکاکاروبار ءِ کمرشل بینک آتا نیٹ ورک نا کمک اٹ مسہ سال انا مد اٹی آسان فنڈ(وام) تننگ ان سلاہ غا حوال تس۔ بینک چنکا کاروبار اسکان اختراعی مصنوعات آتا کمک اٹ رسینگ دوئی کیک وخت اس کہ حکومت بینک آتے رسک شیئرنگ نا آسراتی ایتک۔ اوپارے کہ داوخت آ اسہ لکھ آن زیات چنکا کاروبار کمرشل بینک آتیان ایس ایم ای وام نا آسراتی دوئی کننگ ءُ۔ پوسکن آ اسکیم آن بروک آ مسہ سال اٹی چنکا کاروبار کن وام تا فراوانی نا کچ اٹی 30 درسد ودکی مریک۔ وزیر خزانہ اسکیم نا ستا ءِ کرے و دا اسکیم ءِ بنا کننگ کن بنائی فنڈز(سیڈمنی) فراوان کننگ نا باوری کرفے۔ اوپارے کہ چنکا وام تا فراوانی آن ہندی کہول آ روزگار نا وارخواہی ودک ہراڑآن جم قومی پیداوار وپائیدار اقتصدی بڑھوتری ٹی ودکی مریک۔
