کوئٹہ۔ 06 مئی (اے پی پی) پاکستان تحریک انصاف بلوچستان نا راہشون حمزہ خان ناصر ژوب اٹی پاک اوغان سیم آ باڑ خلنگ نا وخت آ دہشت گرد آتا کنڈآن سیم انا ایپار آن ایف سی کارندہ غاتیا جلہو نا واقعہ نا ترندی اٹ مذمت ءِ کرسا پارینے کہ ہمسایہ ملک آن پاکستانی فورس آتیا جلہو ءِ اسُل منپنہ، داوڑنا جلہو آتیان پاک فوج و ایلو کانود نافذ کروک آ ادارہ غاتا حوصلہ ءِ شیف شاغنگ مفک، الس نا جان و مال و سیم تا رکھ اکن تینا جان تے ندر کروک آ کارندہ غاک نان قومی ہیروک ءُ ہرافتے نن خراج عقیدت پیش کینہ۔ داڑے جاری مروک آ اسہ بیان اسے ٹی حمزہ خان ناصر دہشت گرد آتا جلہواٹی ایف سی کارندہ غاتا شہید ی آ ڈکھیائی و است ہسونی نا درشانی ءِ کرسا شہید آتے زبردست لوز آتے ٹی خراج عقیدت پیش کرے۔ اوپارے کہ سیم انا ایپارآن پاکستانی سیکورٹی فورس آتیا دہشت گرد آتا جلہو گڑتی نا سوب ءِ پاک فوج، ایف سی و ایلو کانود نافذ کروک آ ادارہ غاتا حوصلہ بڑز ءِ داوڑنا جلہو آتیان ننا حوصلہ ءِ شیف شاغنگ مفک پاکستان دہشت گرد آتا سفایا ءِ کرسا گڑاچپ کیک، دہشت گردآک اسل تینا ناپاک مسخت آتے ٹی سرسہب مفسہ اوپارے کہ داوڑ نا جلہو آتیان سیم تیا امن و سوگوی کن برجا کوشست آتے نسخان رسینگک پاک اوغان سیم آ باڑ خلنگ نا کاریم ءِ ہرحال اٹ پورو کننگک۔ اوپارے کہ سیم انا ایپار آن پاکستانی فورس آتیا جلہو ءِ اسل منپنہ، پاک فوج، ایف سی و ایلو کانودنافذ کروک آ ادارہ غاک داوڑنا جلہو آتا پبی ورندی ءِ ایترہ۔ او سم کاری ٹی شہید مروک آ کارندہ غاتا خاہوت آتون ہڑزخواہی و ٹھپی مروک آتا زوت دراخ جوڑی کن دعا کرے۔
