جوہانسبرگ۔ 08 اپریل (اے پی پی) پاکستان و سویلی افریقہ نا کرکٹ ٹیم تا نیام اٹ 4 ٹی۔ 20انٹرنیشنل میچ آتیا تالان سیریز نا اولیکو میچ ہفتہ نادے آ وانڈیرس اسٹیڈیم، جوہانسبرگ اٹی مریک۔ داکان مست ہڑتوم آ ٹیم تا نیام اٹ مروک آ مسہ ون ڈے میچ آتا سیریز ءِ پاکستانی ٹیم 2-1اٹ کٹاسس۔ گرین شرٹ پروٹیز ءِ اولیکو ون ڈے میچ اٹ 3وکٹ آتے اٹ شکست تس، ارٹ میکو میچ اٹی میزبان ٹیم کم بیک کرسا پاکستان ءِ 17رنز اٹ باترفے، اوکان پد فیصلہ کن ون ڈے میچ اٹ پاکستانی ٹیم سویلی افریقہ ءِ 28رنز اٹ مات ترسا مسہ میچ آتاسیریز 2-1اٹ تینا پن آ کرے۔ چارٹی 20انٹرنیشنل میچ آتا سیریز اٹی ہم پاکستانی ٹیم انا کماشی ءِ بابر اعظم کیک وخت اس کہ میزبان ٹیم تمباباومانا کماشی ٹی میدان اٹ دڑنگک۔ ہڑتوم آ ٹیم تا نیام اٹ ٹی 20سیریز 10اپریل آن بناکیک، ارٹ میکو میچ 12اپریل، مسٹ میکو میچ 14اپریل وخت اس کہ چارمیکو و آخیریکو میچ 16اپریل آ مریک۔ اولیکو اِرامیچ جوہانسبرگ و آخیریکو اِرا میچ سنچورین نا میدان اٹ مریک۔
