اسلام آباد۔ 17 مارچ (اے پی پی) فیڈرل بورڈ آف ریونیو (ایف بی آر) نا چیئرمین محمد جاوید غنی پارینے کہ ایف بی آر اٹی انفارمیشن ٹیکنالوجی نا کاریم اٹ اتنگ نا کمک اٹ اصلاحات اتنگ انگ ءِ ہرانا مثبت زہم مون آ بننگ ءِ۔ برجامالی سال اٹی نئے بیرہ کٹیا یکجا کننگ نا کچ اٹی ودکی مسنے بلکن خراج تروک آتے آسراتی و خذمت آتا فراوانی ٹی ہم گچینی بسنے۔ چارشنبے نادے آ اسہ انٹرویو اسے ٹی او پارے کہ ادارہ ٹی آئی ٹی آ مبنی اصلاحات نا پروگرام نا بھاز جوان ءُ نتیجہ اس مون آ بننگ ءِ، داگام گیج آتا سوب آن برجامالی سال اٹی کٹیا یکجا کننگ نا کچ اٹی تدوک آ سال انا مقابلہ ٹی ودکی مسنے، داکان بیدس خراج تروک آتے آسراتی و خذمت آتا فراوانی ٹی ہم گچینی بسنے۔ اوپارے کہ خراج کلچر نا مون آ دننگ و خراج نا بنداو اٹ ودکی کن ایف بی آر نا کنڈآن کیہی گام گیج کننگانے، چندی ملک آتون کسٹمز و ٹیکسیشن نا بابت باندات آتیٹی کمکاری نا معاہدہ کننگ انگ ءِ، تاجکستان تون کسٹمز اٹ کمکاری نا معاہدہ غا دستخط مسنے وخت اس کہ کسٹمز و برادر ملک سعودی عرب تون کسٹمز و ٹیکسیشن نا بابت امور اٹی کمکاری کن مفاہمت نا دستاویز آ امنا مسنے۔ داکان بیدس ایف بی آر اینگریٹی مینجمنٹ پروگرام ءِ گچین کرینے دامسخت کن غاوتا درج و ازالہ کن خصوصی پورٹل اس جوڑ کننگانے۔ چیئرمین ایف بی آر پارے کہ اسمگلنگ نا ناسور نا برخلاف کارروائی تے ترند کننگانے۔ دارداٹ مچ آ ملک اٹی اسمگلنگ نا برخلاف آپریشن برجاءِ ہرانا جوان ءُ نتیجہ اس مون آ بننگ ءِ۔ اوپارے کہ پوسکن آ ٹریک اینڈ ٹریسی نظام آن خذمت آتا فراوانی ٹی نمان گچینی بریک و داٹی انسانی مداخلت ءِ کم آن کم تخنگ اٹ کمک رسینگک۔ داڑآن کٹیا تا لیکج نا مون ءِ توننگ و انڈر انوائسنگ اٹی کمتی بریک۔ چیئرمین ایف بی آر پارے کہ ایف بی آر خراج نا بنداو اٹی ودکی و خراج تروک آتے آسراتی تا فراوانی کن سنبرینگوک ءِ و دارداٹ گام گیج آتا چرجوئی برجاسلک۔
