فیصل آباد۔ 17 مارچ (اے پی پی) پی ٹی آئی نا مرکزی راہشون و بنجائی پارلیمانی سیکرٹری ریلوائی میاں فرخ حبیب پارینے کہ یوم پاکستان درحقیقت داعہد نا تجدید نا دےءِ کہ نن بطور پاکستانی انفرادی و اجتماعی کہول آ تینا پبی کڑد ءِ ادا کرسا ملک و قوم انا شونداری کن جانفشانی اٹ خذمت نا چرجوئی ءِ برجاتخنہ۔ 23 مارچ آ یوم پاکستان نا بابت اے پی پی تون گپ وتران اٹی او پارے کہ بابائے قوم قائد اعظم محمد علی جناح و مفکر پاکستان علامہ محمد اقبال نا کوشست آتیان برصغیر پاک و ہند انا مسلمان تیکن ہرامزل نا تعین ءِ کننگاسس اوٹی اینو نن آجو فضاٹی ساہ ہلنگ اُن و داپاک دھرتی ننے آجوئی تون اوار ہرگڑا داتسکان کہ غٹ آن زیات بحیثیت مسلمان و پاکستانی تینا پہچان و شناخت تس۔ اوپارے کہ نن دا آجوئی آ اللہ نا اخس کہ شکر ءِ ادا کین کم ءِ ولے داسہ ننے داہم سجفوئی ءِ کہ اونا بدلہ نن ارض پاک ءِ انت تننگ اُن۔ اواقبال نا کلہو’’ہر بندغ ءِ ملت نا مقدر نا ستارہ‘‘ نا حوالہ ءِ ترسا پارے کہ ننا تعلق ہراکہ سیاست جماعت آن مرے ، ننا ہراکہ شعبہ یا مسلک مرے ننا بنداوی سوچ و اولیت ہندا مرے کہ نن بیرہ پاکستانی اُن و پاکستان ننا پہچان آخا بلکن جان ہم ارے ہنداخاطرآن دانا عزت و حرمت ننا ایمان نا بشخ ہم ارے تانکہ ننا بزرگ آک دا لمہ وطن نا دوئی کننگ کن ہرا قربانی تے تسنو اوفتا حق ءِادا کننگ کین۔ اوپارے کہ 23 مارچ ننا ملکی تاریخ نا اہم ءُ دے اسے ہراننے یات ترفک کہ ننا بزرگ آک پاکستان نا جوڑ کننگ کن بھلو قربانی اس تسر۔
