اسلام آباد۔ 17 مارچ (اے پی پی) وزیر خارجہ مخدوم شاہ محمود قریشی پارینے کہ پی ڈی ایم نا تہہ نا بے چیٹی، پاش آن پاش مون آ بسنے۔ پیپلزپارٹی اسُل سندھ حکومت نا قربانی ءِ تفک۔ چارشنبے نادے آ پی ڈی ایم نا بابت اہم بیان اسے ٹی وزیر خارجہ پارے کہ ای مدام پارینٹ کہ پی ڈی ایم اسہ غیر فطری ءُ سیوت اسے۔ اوفتا منشور و سوچ اسٹ اف، دا کٹھ جوڑ بیرہ فائدہ غاتا سوب آن ءِ۔ شاہ محمود قریشی پارے کہ سینیٹ گچین کاری تیٹی دا اسہ ایلو آ شک و شبہ نا درشانی ءِ کرسا کرینو وخت اس کہ اینو اوفتا تہہ نا بے چیٹی پاش آن پاش مون آ بسنے۔ وزیر خارجہ پارے کہ درو آصف علی زرداری استیفہ غاتیکن نواز شریف نا پدی بننگ نا شڑت ءِ تخا ہرادے مریم نواز ہمو دیوان اٹی مسترد کرے۔ استیفہ غاتا خواست انا بابت کنا بیانک ریکارڈ آ ساڑی ءُ۔ ای اولیکو دے آن پارسا بننگ اُٹ کہ پیپلزپارٹی استیفہ تفک۔ پیپلزپارٹی اسُل سندھ انا حکومت نا قربانی ءِ تفک۔ شاہ محمود قریشی پارے کہ پی ڈی ایم نا سیوت، نیب انا گرفت آن بچنگ کن ءِ۔ پیپلزپارٹی و نون لیگ ہڑتوم آک تینا تینا فائدہ غاتیکن اسہ ایلوءِ کاریم اٹ ایسورہ تانکہ مسخت پورو مننگ آن پد کسرءِ جتا کننگے۔ شاہ محمود قریشی پارے کہ اوفک تینا بچفنگ کن پی ڈی ایم اٹی پڑاؤ کریسر، اوفتے ٹی اختلاف نا سوب مولانا فضل الرحمان ناراضگی نا درشانی ءِ کرسا لانگ مارچ ءِ منسوخ کرے و کانفرنس ءِ ہلا ہنا۔
