اسلام آباد۔ 17 مارچ (اے پی پی) بنجائی وزیر داخلہ شیخ رشید احمد پارینے کہ پاکستانی تیکن کویتی ویزہ ءِ زوت ملنگ والا اُن، نواز شریف نا پاسپورٹ شارٹ نوٹس آ تیار کننگ کن تیار اُن، نواز شریف داپاسپورٹ آ بیرہ پاکستان آ بننگ کیک، پی ڈی ایم مارچ ءِ ملتوی کرسا بھاز جوان ءُ فیصلہ اس کرینے۔ چارشنبے نادے آ داڑے پریس کانفرنس آن تران کرسا بنجائی وزیر داخلہ پارے کہ ای قطر آ ہناسٹ ہراڑے اوڑتون جوان ءُ ہیت گپ مسنے، پاکستانی قوم اکن مستائی اسے کہ پاکستانی تیکن 2011 آن کویت نا ویزہ بند ئس داسہ کویت نا وزیر داخلہ بسنے، کویت نا ویزہ زوت ملنگک۔ اوپارے کہ وزارت داخلہ ٹی 18، 18 سال آن تولوک آفیسر آتے بدل کینہ۔ شیخ رشید احمد پارے کہ پی ڈی ایم مارچ ءِ ملتوی کرسا بھاز گچین ءُ فیصلہ اس کرینے، سیاست اٹ سکون بسنے و داسہ روچہ غاک یخ تدینگرہ، پی ڈی ایم ءِ پاوہ کہ اسمبلی آ بریر و مذاکرات کیر۔پی ڈی ایم عمران خان ءِ شکست تننگ کپک، عمران خان سیاسی وڑاٹ ہیوی ویٹ لیڈر ءِ ہرااوفتیان تمیپک۔ اوملک انا اسہ کنڈاسے ہم ہلیتوس ہراڑے اوفک 6 تُواٹی جلسہ کتنو۔ اسہ سوج اسے نا ورندی ٹی بنجائی وزیر پارے کہ (ن) لیگ اٹی اِراسیاسی سوچ انا پڑک ءُ و اوفتا خاہوت آتا تہہ ٹی ءِ۔ اوپارے کہ پی ڈی ایم نا دیوان اٹی پاکستان پیپلزپارٹی سیاسی ءُ فیصلہ اس کرینے۔ اوپارے کہ پاکستان و قطر انا نیام اٹ گچین تعلقداری ءِ، قطر آن ایل این جی نا ڈیل مسنے۔ اوپارے کہ اپوزیشن 6 تُو آن ٹی وی ٹی وی گوازی کننگ ءِ، ملک اٹ اِراڈیم جوڑ مننگ والا ءِ، بجلی اڑزآن مریک، روزگار ملک۔ بنجائی وزیر پارے کہ وزیراعظم عمران خان غٹ وزیر آتے متحرک مرسا کاریم کننگ نا پارت کرینے، نواز شریف نا پاسپورٹ شارٹ نوٹس آ تیار کننگ کن تیار اُن۔ نواز شریف داپاسپورٹ آ بیرہ پاکستان آ بننگ کیک۔ اوپارے کہ نئے ایلو تا وزارت اٹی نیام تمیوہ و نئے کننگ کن ہلیوہ۔ وزیراعظم نا کلہو ءِ ہلسا قطر آ ہناسٹ۔
