اسلام آباد۔ 17 دسمبر (اے پی پی) اقتصادی امور نا بنجائی وزیر مخدوم خسرو بختیار پارینے کہ پاکستان راجی رکھ، نیزگاری نا چٹفنگ، ٹیکسٹائل ، ڈیری و پاڷ انا پیدوار نا بشخ آتیٹی ایلو ملک آتے تینا آزموندہ غاتیٹی اوار کننگ کن تیار ءِ، ساڑی حکومت احساس پروگرام نا کمک اٹ راجی رکھ و نیزگاری نا چٹفنگ کن گام گیج کننگ ءِ ہرانا جہانی کہول آ ہم ستاءِ کننگ انگ ءِ۔ اوداہیت ءِ اسلامی شونداری بینک انا کمک اٹ پاکستان میپنگ ریسورس سینٹر نا رپورٹ ءِ جاری کننگ نا وخت آ پارے۔ پنچ شنبے نادے آ رپورٹ ءِ جاری کننگ نا آن لائن دود انا اسیجائی کماشی ءِ اقتصادی امور نا بنجائی وزیر مخدوم خسرو بختیار و اسلامی شونداری بینک انا صدر ڈاکٹر بندرحجار ئسک کریر۔ دارپورٹ اٹی کشت وکشار، کشت آ کشار آ مبنی صنعت، فارماسیوٹیکل نا صنعت و انفارمیشن ٹیکنالوجی کون آ چار اہم بشخ آتا احاطہ ءِ کننگانے۔ رپورٹ اٹ 16 پاکستانی ادارہ غاتا پروفائل تننگانے ہرافتا تعلقدار بشخ آتیٹی بھلو آزموندہ اسے و دا ادارہ غاک پت انا قابل ٹیکنالوجی تا کمک اٹ ہندن ءُ مہارت دوئی کرینو ہرافتا باسک ملک آتون تبادلہ ءِ کننگ مریک۔ مخدوم خسروبختیار داوخت آ پاکستان نا راجی و اقتصادی شونداری ٹی اسلامی شونداری بینک انا کڑد انا ستاءِ کرے و اونا منت واری ءِہرفے۔ اورپورٹ نا تیاری ٹی اسلامی شونداری بینک و پاکستانی ادارہ غاتا کڑد انا ہم ستاءِ کرے و پارے کہ دا رپورٹ انا کمک اٹ باسک ملک آک تعلقدار بشخ اٹی پاکستان نا مہارت و آزموندہ غاتیان فائدہ ہرفنگ کیرہ۔ مخدوم خسرو بختیار پارے کہ پاکستان راجی رکھ، نیزگاری نا چٹفنگ، ٹیکسٹائل و ڈیری وپاڷ انا پیدوار نا بشخ آتیٹی بھلو مہارت و آزموندہ اس تخک۔ ساؤتھ ساؤتھ کمک نا رداٹ پاکستان باسک ملک آتے تینا آزموندہ غاتیٹی اوار کننگ خواہک۔ اسلامی شونداری بینک انا صدر ڈاکٹر بندرحجار پاکستان اٹ دستیاب کچ و چاہندار آتا ستاءِ کرے و دا اومیت نا درشانی ءِ کرے کہ باسک ملک آک داڑآن پبی فائدہ ہرفرہ۔ اوپارے کہ اسلامی شونداری بینک کورونا دین انا جہانی دین انا زہم آتے کم کننگ کن باسک ملک آتے ویکسین نا ہلنگ و ایلو بشخ آتیٹی پین 2.5 ارب ڈالر نا کمک فراوان کیک۔ داوخت آ کڑدہ غاک ہڑتوم آ کنڈآتا کمکاریءِ برجاتخنگ نا عزم انا درشانی ءِ کریر۔ آن لائن دیوان اٹی اسلامی شونداری بینک انا باسک ملک آتا عہدیدار و چاہندارآک ہم بشخ ہلکر۔
