پشاور۔ 16 دسمبر (اے پی پی) وزیراعظم عمران خان ورناتے باوری کرفے کہ آئی ٹی انڈسٹری نا شونداری کن اوفتا کمک ءِ کننگک۔ ملکی شونداری ٹی سمال اینڈ میڈیم انٹر پرائزز نا اہم کڑد اس مریک ہرادے مستین اٹ گوجالنگا۔ اسہ ہندن ءُ سسٹم اس اتنگ نا گرج ءِ ہراڑے بینک ورناتا بزنس آئیڈیا کن پورو کمک کیر۔ داخیال آتا درشانی ءِ او چارشنبے نادے آ پشاور اٹی سرسہب ورنا پروگرام نا رداٹ چیک بشخنگ نا دود آن تران کرسا کرے۔ وزیراعظم پارے کہ ننے تینا ورناتا کچ آن فائدہ ہرفنگ نا ءِ۔ ننے خوشی ءِ کہ ننا ورناک لائیو اسٹاک نا بشخ انا شونداری نا خواہندار ءُ۔ اواومیت ظاہر کرے کہ ورناک سائنسی بنداو تیا دا بشخ انا شونداری کن کاریم کیرہ ہراڑآن ملک اٹی پاڷ و لائیو اسٹاک نا پیدوار اٹی ودکی مریک۔ اوپارے کہ اگہ نن پاڷ انا پیدوار ءِ اِراہنداخہ کننگ اٹ سرسہب مسن تو آبادی نا بھلو بشخ اسے فائدہ مریک۔ قبائلی علاقہ غاتا ورناتے ہم روزگار کن وام تننگک ہراپدی سلیسونو۔ اوپارے کہ سرسہب ورنا پروگرام نا رداٹ چیک بشخنگ نا بروک آ پروگرام سویلی وزیرستان اٹ مریک۔ وزیراعظم پارے کہ کے پی کے ٹی سیل و سوات نا مون آ دننگ نا بھلو گمان اس ارے۔ حکومت تنخواہ دار تپہ کن اڑزآن اُرا جوڑ کننگ نا ڈٹ اس تسنے۔ سرسہب ورنا پروگرام آن ورناتے چنکا کاروبار اس بناکننگ اٹ کمک رسینگک۔ اوپارے کہ پاکستان دنیا نا ارٹ میکو بھلا ملک ءِ ہراڑے ورناتا کچ غٹ آن زیات ءِ ہرافتیکن حکومت چندی پروگرام بناکرینے۔ ننا داسکان شروعات ءِ۔ اوپارے کہ ورناتے دوکان یا ہوٹل جوڑ کننگ کن بینک آتیان وام تا آسراتی فراوان کننگک۔ اوپارے کہ ہر پروگرام ءِ سرسہب کننگ کن آئیڈیا نا گرج مریک اوکان پد داڑآ کاریم مریک۔ وزیراعظم پارے کہ مستین اٹ سمال اینڈ میڈیم انٹرپرائزز آ چکار کننگتو۔ بینک آتے ہم ویل آتا مون تروک ئس و ورناتے وام ملیتوکہ۔ اوپارے کہ امریکہ ٹی سلیکین ویلی آئی ٹی نا شونداری کن بھلو کڑد اس ادا کرے و بیرہ 20، 25 بندغ دا آئیڈیا تسر و ہرسا ہرسا او دنیا نا ہزگار بندغ مس۔ اوپارے کہ کنے پاکستان آن پیشن پاکستانی تے ہُننگ نا موقع رسینگانے۔ سیاست اٹ بننگ آن مست کرکٹ اٹی اوفتے تون اوڑدہی مسکہ۔ اوپارے کہ نن خوانہ کہ سسٹم نا رداٹ ورناتا کمک ءِ کننگے۔ نن بروک آ ریسہ ٹی سویلی وزیرستان نا ورناتے ہم وام ایتنہ۔ وزیراعظم پارے کہ کنے خوشی ءِ لائیو اسٹاک نا بشخ اٹی ہم مخلوق بننگ ءِ۔ اوپارے کہ نیوزی لینڈ و یورپی ملک آتیٹی لائیو اسٹاک اٹ بھلو شون اس کرینو ہراڑے پاڷ انا پیدوار 6 گناءِ و نن خوانہ کہ پاکستان اٹ لائیو اسٹاک شون ہلے و پاڷ انا پیدوار دگنی مرے۔ اوپارے کہ کے پی کے ٹی زیباءُ سیل و سواتی ہند ارے ہراڑے باسنی تیٹی سیل و سوات اٹ ودکی مریک و یخ آتیٹی سکی ءِ مون آ دننگ مریک۔ وزیراعظم پارے کہ بیرہ سویٹزر لینڈ اٹ سکی نا ٹورازم آن 80 ارب ڈالر نا کٹیا مریک۔ اوپارے کہ ننے آئی ٹی نا بشخ آ چکار کننگ نا گرج ءِ ہرا ترندی اٹ مون آ ہِننگ ءِ۔ داکان مست وزیراعظم عمران خان سرسہب درخواست تروک آتیٹی چیک بشخا۔
