وزیر خارجہ مخدوم شاہ محمود قریشی نا اوغان طالبان سیاسی کمیشن نا ڈل اتون اوڑدہی ٹی گپ وتران

اسلام آباد۔ 16 دسمبر (اے پی پی) وزیر خارجہ مخدوم شاہ محمود قریشی پارینے کہ اوغانستان اٹی امن مچ آ ڈیہہ نا امن و سوگوی کن المی ءِ۔ پاکستان اوغانستان اٹی دیرپا وآخبت امن و اوغانستان تون کثیر الجہتی برادرانہ مراسم نا مون آ دننگ نا متمنی ءِ۔ داہیت ءِ او اوغان طالبان سیاسی کمیشن نا ڈل اتون گپ وتران کرسا پارے ہرافک چارشنبے نادے آ ملاعبدالغنی برادر نا کماشی ٹی وزارت خارجہ ٹی اوڑتون اوڑدہی کریر۔ وزیر خارجہ اوغان ڈل ءِ وزارت خارجہ غا بننگ آ بخیر اٹ پارے و پارے کہ اوغان  طالبان نا ڈل اتون مروک آ تدوک آ اِرا نشست بھاز سودمند ئسر۔ شاہ محمود قریشی پارے کہ دوحہ ٹی امریکہ طالبان نا نیام اٹ طے مروک آ امن معاہدہ ٹی، پاکستان تینا ممکن خیرخواہی کڑد ءِ ادا کرے۔ بین الاوغان مذاکرات نا بابت قاعدہ و ضابطہ غا اتفاق بھاز ستاکڑزک۔ پاکستان اولیکو دے آن پارسا بننگ ءِ کہ اوغانستان اٹی امن نا اسٹ انگا کسر بھرمی و جامع مذاکرات نا اڈتننگ ءِ۔ پاکستان اوغانستان اٹی دیرپا و آخبت امن نا متمنی ءِ۔ وزیرخارجہ پارے کہ ای وقتا فوقتا چندی ملک آتا وزیر خارجہ غاتون گپ وتران اٹی اوغان امن عمل و اوغانستان نا پوسکن تعمیر کن جہانی برادری نا کڑد انا گرج آ زور شاغاٹ۔ نن سمجھنہ کہ اوغانستان اٹی امن مچ آ ڈیہہ نا امن و سوگوی کن المی ءِ۔ شاہ محمود قریشی پارے کہ اینخو سال محترم عبداللہ عداللہ، گلبدین حکمت یار و اوغان ویلیوسی جرگہ نا باسک آک پاکستان آبسر اوفتے جوان اوڑدہی مس۔ ساڑی ہی ٹی وزیراعظم عمران خان اوغانستان آ ہنا، ہموڑے ہم پاکستان ہنداکلہو ءِ تس کہ پاکستان اوغانستان اٹ دیرپا و آخبتی امن نا خواہندار ءِ۔