اسلام آباد۔ 16 دسمبر (اے پی پی) بنجائی وزیر داخلہ شیخ رشید احمد پارینے کہ کنا است خواہی ءِ کہ نیامی کسر اس پش تمے ولے اگہ اپوزیشن استیفہ تننگ خواہک تو شوق اٹ ایتے، پیپلزپارٹی ءِ سیاست اٹ گچین ءُ پوزیشن اسے ٹی خننگ اُٹ۔ بلاول نا استیفہ غاتا ایٹم بمب ءِ چلیفنگ نا دھڑکوک پھلجھڑی مریک۔ یخین ءِ شہباز شریف مثبت سوچ اتون مون آ ہِننگ نا ہیت ءِ کیک، گڑاس سیاست دان خوارہ کہ جمہوریت بندگلی ٹی پترینگے۔ چارشنبے نادے آ ایف آئی اے ہیڈ کوارٹر نا دورہ ءِ کننگ آن پد میڈیا تون گپ وتران کرسا وزیر داخلہ شیخ رشید احمد پارے کہ ایف اے ٹی ایف نا بابت وزارت داخلہ گچینی کرینے و پین کیک۔ وزیر داخلہ پارے کہ شہباز شریف و بلاول بھٹو زرداری نا درو اوڑدہی مسنے و بلاول استیفہ غاتا ایٹم بمب اس چلیفنگ نا دھڑکو تسنے ولے کنے یخین ءِ کہ او پھلجھڑی اس مریک۔ انتئے کہ گڑاس بندغ بے کچ ءُ گام اس ہرفنگ خوارہ تانکہ جمہوریت بندگلی ٹی پترینگے و خوانخواستہ جمہوریت ءِ خطرہ اس مون تروک مرے۔ اوپارے کہ اپوزیشن اگہ اسلام آباد آ بننگ خواہک تو شوق اٹ برے، اوفروری ٹی لانگ مارچ انا پڑو ءِ کرینو گچین ءِ او داکان مست بریر، نن ہم داڑے 126 دے رہینگاسن۔ اوپارے کہ اپوزیشن ءِ استیفہ پارٹی صدر آتے تروئی ءِ و مسلم لیگ (ن) نا پارٹی صدر شہباز شریف ءِ و کنے پورو یخین ءِ کہ او مثبت سوچ اتون سیاست ءِ مون آ دننگ ناہیت ءِ کیک۔ اوپارے کہ ہزار آتا کچ اٹ چندی وڑنا غاوک ءُ و ایف آئی اے ءِ فنڈ آتا گرج ءِ ہراڑآ ای دمدستی وڑاٹ 2 ارب روپئی تننگ نا پڑو ءِ کننگ اٹی اُٹ۔
