پشاور۔ 16 دسمبر (اے پی پی) وزیراعظم پاکستان عمران خان چارشنبے نادے آ پشاور نا اہم ترین ڈٹ پشاور انسٹیٹیوٹ آف کارڈیا لوجی نا بناءِ کرے، داوخت آ وزیراعلیٰ خیبرپختونخوا محمود خان، صوبائی وزیر جان جوڑی تیمور سلیم جھگڑا، چیف سیکرٹری خیبرپختونخوا کاظم نیاز وایلو بڑزکو کمامدارآک ہم اوڑتون اوارئسر۔ پشاور انسٹیٹیوٹ آف کارڈیا لوجی نا جوڑ کننگ نا پڑو ءِ ایم ایم اے نا دور حکومت اٹ مسوسس ولے بھلو وخت اسسکان دا ڈٹ انا تفنگ آ ہچ ءُ پیش رفت اس مننگ متویسس۔ اوکان پد پاکستان تحریک انصاف نا تدوک و ساڑی صوبائی حکومت آک دا ڈٹ ءِ تینا اولیت آتیٹی اوار کرے و ترندی اٹ دانا تفنگ ءِ ممکن کرے پشاور انسٹیٹیوٹ آف کارڈیا لوجی 262 کٹ انا طبی مرکز ءِ ہرانئے بیرہ پشاور بلکن خیبرپختونخوا نا ایلو ضلع غاتا است انا مرض آتیٹی اختہ ناجوڑ آتے ہم وڑنا طبی آسراتی فراوان کیک۔ دامرکز آن اوغانستان آن بروک آ ناجوڑآک ہم فائدہ ہرفنگ کیرہ۔ وزیراعظم حیات آباد اسپورٹس کمپلیکس نا ودیکی ڈٹ انا ہم بناءِ کرے۔ دا ڈٹ انا رداٹ آئی سی سی سٹینڈرڈز نا رداٹ پوسکن آ اسپورٹس کمپلیکس نا تعمیر مریک ہراٹی گوازی تا جہانی آب انا رداٹ پوسکن انگا آسراتی فراوان کننگک۔
