اسلام آباد۔ 16 دسمبر (اے پی پی) وزیراعظم نا خصوصی کمکار امور نوجوانان عثمان ڈار پارینے کہ پاکستان پیپلزپارٹی و پاکستان مسلم لیگ (ن) نا سرکڑدہ غاک ملک اٹی ساڑی آ زرگزرانی تنکی و نہاد آتیٹی ودکی نا زموار ءُ۔ چارشنبے نادے آ نجی ٹی وی چینل تون گپ وتران کرسا اواپوزیشن ءِ تنقید نا شست کرے و پارے کہ ملک اٹی بھلو کچ اسے آ وڈی خوری و منی لانڈرنگ نا سوب آن مخلوق اینو کبینی و ایلو مشکل آتا گواچی ءُ۔ اوپارے کہ دا ہڑتوم آ جماعت آک تینا دور اقتدار اٹی قومی خزانہ ءِ بے دڑدی اٹ پُلار۔ اوپارے کہ پاکستان تحریک انصاف نا حکومت نا کارکڑد پیپلزپارٹی و مسلم لیگ(ن) نا مسکوہی دور تا نسبت بھاز جوان ءِ و وزیراعظم عمران خان نا کماشی ٹی پی ٹی آئی نا حکومت ملک و الس نا گچینی و شونداری کن گچین وڑاٹ کاریم کننگ ءِ و مخلوق چاہک کہ عمران خان اسہ ایماندار ءُ مخلص ءُ سرکڑدہ سے۔ اوپاکستان ڈیموکریٹک موومنٹ(پی ڈی ایم) لاہور نا جلسہ ءِ فلاپ شو اس گوندسا پارے کہ پی ڈی ایم 11 جماعت آتا اسہ ٹولہ اسے ہرا کورونا دین انا کیس آتیٹی ودکی خواہک و اوفتا غیر فطری سیوت منی لانڈرنگ نا کمک اٹ مچ کروک آ دولت نا رکھ اکن داوڑنا چم آتا کاریم اٹ اتنگ ناءِ۔ عثمان ڈار مستی پارے کہ پی ٹی آئی نا حکومت مسکوہی دور تیٹی ملک ءِ مون تروک زرگزرانی تنکی، امن و ایمنی نا خراب حالیت و ادارہ غاتا بھسکاری تون اوار غلطی تے سہی کننگ ءِ۔ اوپارے کہ الس حزب اختلاف نا جماعت آتا بیانیہ ءِ ہم مسترد کرینے۔
