اسلام آباد۔ 15 دسمبر (اے پی پی) بنجائی وزیر حوالکاری و شینکاری سینیٹر شبلی فراز پارینے کہ پاکستان اسہ زموار و پرامن ءُ ملک اسے ، پاکستان ءِ نزور کننگ کن بھارت دروغ، تہمت و دوبہ غاتا سیبو ءِ ہلیک، ڈس انفولیب نا ساڑی آ حوال پک کرے کہ بھارت دروغ وجعل سازی ٹی داحداسکان ہِننگ کیک، دنیا ٹی غٹ آن زیات جمہوریت نا دعویٰ کروک آ ہندوستان دا چم آتا سوب آن بے نقاب مرسا فاشٹ ملک اسے نا وڑاٹ مون آ بسنے۔ بھارتی چم و ہندتوا نظریہ غان ڈیہہ نا امن ءِ خطرہ مون تروک ءِ، جہانی برادری نا خاموشی و دوآبہ سوالیہ نشان اسے۔ او چارشنبے نادے آ انسٹیٹیوٹ آف اسٹریٹجک سٹیڈیز(آئی ایس ایس) اٹ’’ہندتوا ذہنیت و بھارت نا ودیک پسند عزم ءِ پہہ مننگ‘‘ نا سرحال آن اڈ ہلوک آ سیمینار آن تران کریکہ۔ بنجائی وزیر حوالکاری سینیٹر شبلی فراز پارے کہ ہندتوا ذہنیت و بھارت نا ودیک پسند عزم اسہ اہم ءُ سرحال اسے داڑآ سیمینار نان اڈتننگ آ منتظمین آتا منت وار اُن۔ اوپارے کہ دنیا نا غٹ آن بھلا جمہوریت نا دعویدار اینو فاشٹ ملک انا وڑاٹ دنیا نا مون آ پاش مسنے۔ اوپارے کہ ننا ہمسایہ ملک ہندوستان ’پاکستان ناتہہ ٹی دہشت گردی نا کارروائی تیٹی براہ راست اوار ءِ‘ پاکستان شاہدی تے دنیا نا مون آ تخانے۔ اوپارے کہ پاکستان اسہ زموارءُ ملک اسے و ڈیہہ نا حالیت آتیان جوانی اٹ معلومدار ءِ و ڈیہہ نا امن و سوگوی ٹی اہم کڑد ادا کننگ ءِ۔ بنجائی وزیر سینیٹر شبلی فراز پارے کہ بھارت مدام پاکستان نا امن ءِ نزور کننگ نا گواچی کننگ کن چندی چم آتیٹی لگوک مس۔ ڈس انفولیب نا ساڑی آ رپورٹ بھارت ءِ پین بے نقاب کرینے کہ او ہراوڑاٹ جعل سازی و دروغ انا سیبو ءِ ہلیک۔ اوپارے کہ علاقائی حالیت آتا بابت پاکستان راستکی تے مون آ تخسا تینا نکتہ نظر ءِ پیش کیک ولے بدبختی اٹ ننا ہمسایہ ملک بھارت مدام راستکی تے چپ و راست کرسا پیش کرسا بننگ ءِ، ہندوستان مدام پاکستان ءِ نزور کننگ کن دروغ، تہمت و دوبہ خلنگ نا سیبو ءِ ہلسا بسنے۔ اوپارے کہ بھارت نا غیر کانودی مقبوضہ کشمیر نا تہہ ٹی بیدادی و بھارت نا تہہ ٹی مسلمان و اقلیت آتون بدترین سلوک حقیقت اٹ ہندتوا نظریہ ءِ و بھارت اٹ دا انتہاپسندانہ حکومت نا عزم آن ڈیہہ نا امن ءِ بھاز خطرہ مون تروک ءِ۔ اوپارے کہ بھارت اسہ خطرناک ءُ گوازی اس کننگ ءِ اودے بے نقاب کننگ کن پاکستان تینا سفر ءِ برجاتخک انتئے کہ مودی و ہندتوا فلسفہ مچ آ دنیا غا پاش مسنے۔
