اسلام آباد۔ 15 دسمبر (اے پی پی) وزیراعظم نا خصوصی کمکار موسمیاتی بدلی ملک امین اسلم پارینے کہ وزیراعظم عمران خان نا ساف و سرسوز پاکستان ویژن ءِ امنا کننگ ءِ، اودے کلائمیٹ ایکشن پیش کروک آ 10 بھلا جہانی راہشون تیٹی اوار کننگانے، پاکستان اسہ زموار ملک اسے نا حیثیت اٹ قدرتی چاگڑد نا رکھ و مون آ دننگ نا کوشست آتیٹی قائدانہ کڑد ادا کننگ کن تیار ءِ، اپوزیشن فرسٹریشن نا گواچیءِ، اوفتا فلاپ شو چٹا و کامیڈی شو بناکرینے، نن مون آ ہنسا پاکستان نا برخلاف ہر چم ءِ سرسہب مننگ کن الیپنہ۔ داخیال آتا درشانی ءِ او دوشنبے نادے آ داڑے اسہ پریس کانفرنس اسے آن تران کرسا کرے۔ ملک امین اسلم پارے کہ وزیراعظم عمران خان بڑزکو کہول انا کلائمیٹ ایکشن سمٹ اٹ ماحولیات نا رکھ و مون آ دننگ و کچٹی نا ویل انا مون ءِ توننگ کن پاکستان نا لائحہ عمل ءِ پبی وڑاٹ تالان کرے۔ پاکستان نا کاربن نا اخراج اٹ اسہ درسد آن ہم کم بشخ ءِ وخت اس کہ دا موسمیاتی بدلی نا اثر آتیان غٹ آن زیات زہمی مروک آ 5 ملک آتیٹی اوار ءِ ولےداکان پد ہم کلائمیٹ ایکشن نا بابت تینا کوشست آتیٹی نئے بیرہ سنبرینگوک ءِ بکن قائدانہ کڑد ادا کننگ کن ہم تیار ءِ۔اوپارے کہ وزیراعظم جہانی فورم آ اِرا بھلو ٹک پیش کرے ہراماحولیاتی کچٹی نا قدرتی ایسر آٹی ءُ۔ ساڑی حکومت نا 10 بلین ٹری سونامی ڈٹ و حیاتیاتی تنوع کن رکھ انگا علاقہ غاتا مون آ دننگ نا پروگرام اوار ءِ۔ امین اسلم پارے کہ نن رکھ انگا علاقہ غاتا کچ ءِ 30 آن ودفسا 45 کرینن وخت اس کہ دا کچ ءِ پین ودفنگک۔ ارٹ میکو اہم گام گیج ملک اٹی ساف و چاگڑد دوست توانائی نا ذریعہ غاتے مون آ دننگ نا بابت ءُ۔ ملک امین اسلم پارے کہ ننا ہدف 2030ء اسکان 60 درسد انرجی مکس ءِ گیگ بدل توانائی آ گدریفنگ نا ءِ۔ دا گام گیج ماحولیاتی کچٹی نا ویل انا مون ءِ توننگ کن اسہ بھلو مزل نا نشان اس مریک۔ اوپارے کہ مسکوہی حکومت دا بابت مجرمانہ پالیسی اختیار کریسس ہرانا رداٹ 50 درسد آن زیات گیگ بدل توانائی گریڈ اٹی اوار مننگ کتوکہ۔ ارٹ میکو پالیسی درآمد کولاآن بابت ئس ہرانا رداٹ پاکستان نا است و کشاری پیدوار نا مرکز اٹ پلانٹ خلکوسر۔ ساہیوال کول پلانٹ اونا اسہ درور اسے۔ اوپارے کہ وزیر اعظم ہندی کولا ءِ گچین ٹیکنالوجی نا کمک اٹ مائع گیس اٹ بدل کرسا کاریم اٹ اتنگ نا پڑو کریسس ہراڑآن کولانا کاریم اٹ اتنگ آن کچٹی ودی مروک کون آ ویل آتیٹی کمتی اتنگ مریک۔ امین اسلم پارے کہ ننا حکومت کچٹی نا ویل انا دیرپا ایسری کن گاڈی تا بجلی آ گدریفنگ نا انقلابی پالیسی اس تیار کرینے ہرانا رداٹ 2030اسکان ملک انا 30 درسد گاڈی بجلی آ گدریفنگ مریک۔ اوپارے کہ دا ماحول دوست گام گیج آتا سوب وزیراعظم عمران خان ءِ 10 بھلا جہانی راہشون تیٹی شمار کننگانے۔ اوپارے کہ چین نا صدر و وزیراعظم عمران خان نا گرین ڈویلپمنٹ نا بابت سوچ اٹ ہم آہنگی ءِ۔ پاک چین اقتصادی راہداری ءِ گرین سی پیک جوڑ کننگک۔ وزیراعظم عمران خان نئے بیرہ ساڑی آ بلکن بروک آ چین تا آخبت ءِ ہم روشنا و سرسوز کننگ نا خواہندار ءِ۔ اوپارے کہ اپوزیشن داسہ تینا فلاپ شو آن پد کامیڈی شوانا بناءِ کرینے و الس اوفتیان جوانی اٹ معلومدار ءِ۔ ملک امین اسلم پارے کہ مریم نواز ءِ بلین ٹری سونامی آن ویل ءِ۔ ای مریم نواز و بلاول ہڑتوم آتے سلہ خلیوہ کہ بریر اوفتے بلین ٹری سونامی نا رداٹ خلوک آ جنگل آتا سیر ءِ کرفینہ۔ اومیت ءِ کہ او زوت استیفہ ایترہ۔
