اسلام آباد۔ 15دسمبر (اے پی پی) متحدہ عرب امارات اٹ رہینگوک آ پاکستانی تا کنڈآن زر ملک آ رادہ کننگ نا کچ اٹی برجامالی سال انا اولیکو پنچ تُو اٹی تدوک آ مالی سال انا ہندا وخت انا مقابلہ ٹی 7.6 درسد ودکی ریکارڈ کننگانے۔ اسٹیٹ بینک انا کنڈآن دا بابت جاری کروک حساب وکتاب نا رداٹ جولائی آن ہلیس نومبر 2020اسکان نا مد اٹی متحدہ عرب امارات اٹی کاریم کروک آ پاکستانی ورکرآک 2.444 ارب ڈالر نا زرمبادلہ ملک آ گدریفیر ہرا تدوک آ مالی سال انا ہندا وخت انا مقابلہ ٹی 7.6 درسد زیاتءُ۔ تدوک آ مالی سال انا ہندا مد اٹی متحدہ عرب امارات اٹ رہینگوک آ پاکستانیک 2.272 ارب ڈالر نا زرمبادلہ ملک آ گدریفیسر۔ حساب و کتاب نا رداٹ نومبر 2020ء ٹی متحدہ عرب امارات اٹ رہینگوک پاکستانیک 519.5 ملین ڈالر نا زرمبادلہ ملک آ مون تسر ہرا تدوک آ سال نومبر نا مقابلہ ٹی 12.98 درسد زیات ءُ۔ تدوک آ سال نومبر اٹی متحدہ عرب امارات اٹ رہینگوک آ پاکستانیک 459.8 ملین ڈالر نا زرمبادلہ ملک آ مون تسوسر۔ اسٹیٹ بینک انا رداٹ برجامالی سال اٹی دوبئی ٹی رہینگوک پاکستانیک 2.034ارب ڈالر نا زرمبادلہ ملک آ گدریفیر ہرا تدوک آ مالی سال انا مقابلہ ٹی 5.4 درسد زیات ءُ۔ تدوک آ سال نومبر اٹی دوبئی ٹی رہینگوک آ پاکستانیک 1.931 ارب ڈالر نا زرمبادلہ ملک آ گدریفیسر۔ ابوظہبی ٹی رہینگوک آ پاکستانیک برجامالی سال انا اولیکو پنچ تُو تیٹی 367.9 ملین ڈالر نا زرمبادلہ ملک آ گدریفیر ہراتدوک آ مالی سال انا ہندا مد انا مقابلہ ٹی 9.1 درسد زیات ءُ۔ شارجہ ٹی رہینگوک پاکستانیک برجامالی سال انا اولیکو پنچ تُو اٹی 28.9 ملین ڈالر نا زرمبادلہ ملک آ گدریفیر ہرا تدوک آ مالی سال انا ہند امد انا مقابلہ ٹی 891.1 درسد زیات ءُ۔ تدوک آ مالی سال انا اولیکو پنچ تُو اٹی شارجہ ٹی رہینگوک آ پاکستانیک 2.9 ملین ڈالر نا زرمبادلہ ملک آ مون تسوسر۔ یات سلے کہ ساڑی حکومت نا کنڈآن کانودی ذریعہ اٹ زر ملک آ گدریفنگ کن ترغیب و آسراتی تننگ اٹ سمندر پار پاکستانی تا کنڈآن ترسیلات اٹی پدریسہ ودکی مننگ ءِ۔ سمندرپار رہینگوک آ پاکستانی تا کنڈآن جاری مالی سال انا اولیکو پنچ تُو اٹی ترسیلات زر ملک آ گدریفنگ نا کچ اٹی تدوک آ مالی سال انا ہندا وخت انا مقابلہ ٹی جم وڑاٹ 26.9 درسد نا نمان ودکی ریکارڈ کننگانے۔ جولائی آن نومبر 2020ء اسکان نا مد اٹی سمندر پار پاکستانیک 11.769ارب ڈالر نا زرمبادلہ ملک آ مون تسر ہرا تدوک آ مالی سال انا ہندا وخت انا مقابلہ ٹی 26.9 درسد زیات ءُ۔ تدوک آ مالی سال انا اولیکو پنچ تُو اٹی سمندر پار پاکستانیک 9.275ارب ڈالر نا زرمبادلہ ملک آ مون تسوسر۔

متعلقہ مضامینمصنف کی طرف سے مزید