اسلام آباد۔ 15 دسمبر (اے پی پی) جاپان نا حکومت کورونا دین اتون مون تننگ نا چرجوئی ٹی طبی ازباب آتا فراوانی کن پاکستان ءِ 1.54 ارب روپئی (اسہ ارب جاپانی ین) نا گرانٹ کمک فراوان کیک، دا رداٹ وزارت اقتصادی امور نا سیکرٹری نور احمد و پاکستان اٹ جاپان نا سفیر کونی نوری متسودا معاہدہ غا دستخط کرینو۔ سمجھوتہ نا رداٹ جاپان نا حکومت کوویڈ۔ 19 نا دین اتون مون تننگ نا چرجوئی ٹی پاکستان نا حکومت ءِ طبی ازباب، ایم آر آئی نظام، آکسیجن جنریٹر و سلنڈر، ای سی جی، بھاز کم درجہ حرارت نا خصوصیت تخوک فریزر، جند انا رکھ انا گڑا، وہیل چیئر و سٹریچر نا ہلنگ کن کمک فراوان کیک۔ اقتصادی امور ڈویژن نا سیکرٹری نور احمد داوخت آ گپ وتران کرسا پارے کہ پاکستان جاپان تون ہڑتوم آ کنڈآتا برادرانہ و دوستانہ تعلقداری تے بھاز اہمیت ایتک۔ پاکستان جاپان نا کنڈآن امداد و کمک آ منت وار ءِ۔ پاکستان نا راجی و اقتصادی شونداری ٹی جاپان مدام تینا کڑد ءِ ادا کرینے و اومیت ءِ کہ کمکاری نا دا چرجوئی آخبت اٹ ہم برجاسلک۔ اوپارے کہ اہم علاقائی و جہانی اقتصادی امور آ ہڑتوم آ ملک آتا اسہ وڑ موقف ءِ۔ اوپارے کہ جاپان پاکستان اٹ پولیو نا چٹفنگ اٹ ہم تینا اہم و انتھک کڑد ءِ ادا کرینے۔ جاپان نا دا کوشست آتا سوب آن پاکستان پولیو نا ناجوڑ نا بھلو حد اسسکان مون ءِ توننگ اٹ سرسہب مسنے۔ جاپان داسہ ہم پولیو نا پورو چٹفنگ اسکان پاکستان نا کمکاری کن سنبرینگوکءِ۔ سیکرٹری اقتصادی امور پمز ہسپتال اٹ آئی سی یو و زچہ و بچہ مرکز نا جوڑ کننگ کن 3.62 ارب ین و حیدر آباد اٹی ہنداوڑ نا کمکاری نا ہم ستاءِ کرے۔ داکان بیدس جاپان اسلام آباد میٹروپولیٹن سٹی ٹی ٹرانسپورٹیشن و پبی کچرہ تون مون تننگ اٹ ہم کمک فراوان کرینے ہراسفت نا قابل ءِ۔ اوپارے کہ کورونا دین انا اولیکو ریسہ ٹی ہم جاپان پاکستان تون بروخت کمک کرے۔ پاکستان داوخت آ دین انا ارٹمیکو ریسہ تون مون تننگ ءِ و ناجوڑی آن زہمی بندغ آتا کچ زیات ءِ ہراڑآن پاکستان نا جان جوڑی نا نظام آ بھاریم ءِ۔ جاپانی امداد اٹ جان جوڑی نا آسراتی تے گچین کننگ و ڈاکٹر و نوطبی عملہ کن خطرہ غاتیٹی کمتی بریک۔ اومستی پارے کہ جاپان جان جوڑی، تعلیم، سلامتی و نوکاپ و زمی جمب کون آ قدرتی آفت آتا وخت آ پاکستان نا کمک ءِ کرینے۔ اوپاکستان تون پدریسہ کمکاری آ جاپان نا حکومت و الس نا منت واری ءِ ہرفے۔
