واشنگٹن۔ 15 دسمبر (اے پی پی) امریکہ نا پوسکن گچین مروک آ صدر جوبائیڈن الیکٹورل کالج نا وونٹنگ آن پد قوم آن تینا تران اٹی پارے کہ اینو ملک اٹ جمہوریت کٹا، داسہ او امریکی قوم ءِ یکجا کننگ کن کاریم کیک۔ ریاست ڈیلاویئر نا شار ولمنگٹن آن تینا تران اٹی جوبائیڈن پارے کہ ملک اٹی حکمرانی نا اصول آتے آزمائش اٹ شاغنگا۔ دھڑکو تننگا ولے دا نزور متو۔ تینا تران اٹی جوبائیڈن صدر ٹرمپ و اونا مخ تف آتا کنڈآن دھاندلی نا دوبہ غاتیا تنقید کرسا اودے جمہوریت آ جلہو گوندا۔ اوپارے کہ اختیار تا ناروا کاریم اٹ اتنگ ہم پرامن انتقال اقتدار ءِ توننگ کتو۔ جوبائیڈن پارے کہ نن غٹ تر چم آتیان پد ہم جمہوریت آ تینا سوگو یخین ءِ تخان، ادارہ غاتیا پت کرین و گچین کاری نا شرف ءِ بچفین، جوبائیڈن پارے کہ گڑاس ءِ شاید داسہ ہم دا سمااف کہ جمہوریت امریکی الس نا است آتون سُرک۔ اونا پاننگ ئس کہ امریکہ ٹی سیاست دانک طاقت دوئی کننگ کپسہ بلکن الس اوفتے دا طاقت ءِ ایتک۔ جمہوریت نا چراغ کیہی پیڑی تیان داڑے روشناءِ۔ نن چانہ کہ جہانی دین، اختیار آتا ناروا کاریم اٹ اتنگ دا شمع ءِ کسفنگ کپک۔ الیکٹورل کالج نا ووٹنگ نا رداٹ جوبائیڈن 306 وخت اس کہ صدر ڈونلڈ ٹرمپ 232 الیکٹورل وونٹ ہلک۔ صدر ٹرمپ الیکٹورل کالج نا وونٹنگ آن پد بائیڈن نا تران آ داسکان ہچ ءُ ردعمل اس تتنے۔ ولے تینا چندی ٹویٹ آتیٹی صدر گچین کاری تیٹی دھاندلی نا دوبہ غاتے دُوارہ پارینے۔
