اسلام آباد۔ 14 دسمبر (اے پی پی) وزیراعظم عمران خان پارینے کہ حکومت زرگزرانی شونداری ٹی میری ٹائم سیکٹر نا فائدہ غاتا رداٹ اونا مون آ دننگ کن کوشست کننگ ءِ، حکومت نا کنڈآن 2020ء ءِ بلیو اکانومی نا سال گوندنگ بحری زرگزران نا شونداری کن حکومتی گام گیج آتا درشانی ءِ۔ داخیال آتا درشانی ءِ او دوشنبے نادے آ نیول ہیڈکوارٹرز اسلام آباد نا دورہ ءِ کننگ نا وخت آ کرے۔ نیول ہیڈکوارٹرز آ بننگ آ پاک بحریہ نا سروک ایڈمرل محمد امجد خان نیازی وزیراعظم ءِ بخیر کرے و پاک بحریہ نا چاق و چوبند دستہ وزیراعظم ءِ گارڈ آف آنر پیش کرے۔ وزیراعظم عمران خان نیول ہیڈکوارٹرز اٹی یات گار شہداء آ پھل شاغا و پرنسپل اسٹاف آفیسر آتون درستی راستی کرفنگا۔ داوخت آ وزیراعظم ءِ علاقائی میری ٹائم سیکورٹی نا حالیت، چیلنج و میری ٹائم سیکٹر نا شونداری کن پاک بحریہ نا گام گیج آتیا سرجم حوال تننگا۔ وزیراعظم ملکی بحری سیم تا دفاع، گوادر بندرگاہ تون اوار سی پیک ءِ سیکورٹی نا فراوانی و علاقائی امن کن پاک بحریہ نا کوشست آتا ستاءِ کرے۔ داوخت آ وزیراعظم عمران خان پارے کہ حکومت پاک بحریہ ءِ وسیلہ فراوان کرسا کیک۔ حکومت زرگزرانی شونداری ٹی میری ٹائم سیکٹر نا فائدہ غاتا رداٹ اونا مون آ دننگ کن کوشست کننگ ءِ۔ اوپارے کہ حکومت نا کنڈآن 2020ء ءِ بلیو اکانومی نا سال گوندنگ بحری زرگزران نا شونداری کن حکومتی گام گیج آتا درشانی ءِ۔ امیر البحر پاک بحریہ نا لائخی تیا پت انا درشانی آ وزیراعظم نا منت واری ءِ ہرفے و پارے کہ پاک بحریہ اللہ تعالیٰ نا کمک اٹ ملکی سمندری سیم و بحری فائدہ غاتا رکھ اکن ہروخت تیار ءِ۔ داوخت آ بنجائی وزیر پرویز خٹک، ڈاکٹر عبدالحفیظ شیخ، سید علی حیدر زیدی، خصوصی کمکار ڈاکٹر معید یوسف و سینئر آفیسر آک ہم ساڑی ئسر۔
