اسلام آباد۔ 14 دسمبر (اے پی پی) وزارت خزانہ نا ترجمان پارینے کہ مسکوہی حکومت آتا کنڈآن ہلوک آ وام تیا سود انا زرتس ساڑی حکومت ءِ وام ہلنگ آ بیوس کرے، حکومت برجا مالی سال اٹی سرکاری وام تیا چاروکی ٹی سرسہبی دوئی کرے و حقی وڑاٹ وام تیٹی ہچ ءُ ودکی اس متنے۔ جم وڑاٹ ساڑی حکومت مسکوہی حکومت آتا دور تیٹی ہلوک آ وام تیا سود انا مد اٹی 57 کھرب روپئی نا بھلو زراس تسنے۔ وزارت خزانہ نا ترجمان یک شنبے نادے آ وام تا بابت جاری مروک آ وضاحتی بیان اٹی پارے کہ حکومت ءِ وام تا بابت بے پک و مشکل حالیت آک میرات اٹی ملار ہرافتے نظم و ضبط، خڑچ آتا جوان وڑاٹ مون ءِ توننگ، و خراج و نان خراج کٹیا تیٹی ودکی نا کمک ءِ قابو ٹی اتنگا، حکومتی کوشست آتیٹی پرائمری بیلنس ودیک مس، مسکوہی حکومت آتا کنڈآن ہلوک آ وام تیا سود انا زرتس ساڑی حکومت ءِ وام ہلنگ آ بیوس کرے۔ ترجمان پارے کہ حکومت برجامالی سال اٹی سرکاری وام تیا چاروکی ٹی سرسہبی دوئی کرے و حقی وڑاٹ وام تیٹی ہچ ءُ ودکی اس متو، اسٹیٹ بینک انا حساب وکتاب نا رداٹ جولائی آن ہلیس اکتوبر 2020ء اسکان نا مد اٹ وام تا اسٹاک اٹ 397 ارب روپئی نا معمولی ودکی اس مسنے ولے دا جہانی مالیاتی فنڈ انا ایڈجسٹمنٹ نا دُوارہ جاچ انا بشخ اف، اگہ اودے ایڈجسٹمنٹس اٹ اوار کننگے تو حقی حساب وکتاب کم و ود اسہ وڑ مریک۔ ترجمان پارے کہ حکومت وام تا انتظام و انصرام نا بابت پامدار پالیسی اس وضع کرینے ہراٹی گونڈ میعاد وام تے مریس معیاد وام تیٹی اوار کننگ و وام ہلنگ نا خڑچ ءِ کم کننگ کون آ گام گیج آک اوار ءُ۔ ترجمان پارے کہ دا گام گیج آتیٹی وام تا جم اسٹاک اٹ ودکی ءِ توننگک۔ ترجمان پارے کہ اسہ پین اہم ءُ عنصر اس ہرانا سوب آن حکومت وام ہلنگ آ بیوس مسنے او جولائی آن ہلیس اکتوبر اسکان نا مد اٹی مسکوہی دور تیٹی ہلوک آ وام تیا دہ کھرب روپئی نا سود انا زرتس نا خواست ءِ، دا جون 2020ء آن مست 47 کھرب روپئی نا زرتس آن بیدس ءُ، جم وڑاٹ ساڑی حکومت مسکوہی حکومت آتا دور تیٹی ہلوک آ وام تیا سود انا مد اٹی 57 کھرب روپئی نا بھلو ادائیگی اس کرینے۔
