ملتان۔ 13 دسمبر (اے پی پی) وزیر خارجہ شاہ محمود قریشی پارینے کہ وار وار جمہوریت نا پن آ الس ءِ پلوک آ سیاسی مداریک اسہ وار ولدا یکجا مرسا الس ءِ خورک و دروغ انا نعرہ غاتے اٹ درو تننگ کن پیش تمانو، ولے عمران خان خورک و دروغ انا نعرہ غاتا حقیقت ءِ پہہ مسنے و پین دا دُز آتا دوتے اٹ ریفنگ کن تیار افس، 70 سال آن پد پاکستانی قوم ءِ وزیراعظم عمران خان نا دروشم اٹ ایماندار سرکڑدہ اس دوبسنے ہرا السی شونداری کن نیک نیتی اٹ کاریم کننگ ءِ،م اپوزیشن آن ملکی شونداری کیدنگ مفننگ ءِ ولے غٹ تر اڑاند آتیان پد ہم شونداری نا دا سفر ہندارفتار اٹ برجاسلک، جلسہ جلوس ساڑی آ حالیت آتیٹی نئے بیرہ انسانی زند اکن نسخان دہ بلکن ملکی شونداری نا کسر اٹ اڑاند مننگ ءِ۔ کورونا دین انا ترند انگا ریسہ ٹی جلس کروک آک الس نا امر خیرخواہ مننگ کیرہ۔ پی ڈی ایم جلسہ کرسا نہادی انسانی جان آتون گوازی کننگ ءُ۔ حکومت جلسہ جلوس آتیان خلیپک۔ وزیراعظم پاکستان السی زند ءِ بچفنگ کن پی ڈی ایم آن جلسہ ءِ موخر کننگ نا خواست کرے۔ داخیال آتا درشانی ءِ او تدوک آ دے این اے 156و این اے 157 اٹ السی رابطہ مہم نا چرجوئی ٹی چندی دود آتیان تران کرسا کرے۔، اوپارے کہ مستین اٹ باری تا سیاست ملک ءِ نسخان تس کرپشن آن ملک انا روتہ غاتے خورک و ادارہ غاتے بھس کننگا داسہ ہراتم دُز آتیان دُزوک آ پیسہ غاتا حساب ءِ خواہنگا تو دُزآتا ٹولہ تینا پلوک آ مال ءِ بچفنگ کن اسل ءِ کاریم اٹ اتنگ خوارہ۔داکان مست وزیر خارجہ مخدوم شاہ محمود قریشی ملتان اٹ میٹروروٹ انا تفنگ اٹ شہید مروک آ مسیت نا پوسکن تفنگ نا بناءِ کننگ نا وخت آ دود آن تران کرسا پارے کہ مسیت نا تفنگ صدقہ جاریہ ءِ ہراتم اسکان مسیت اٹ نمازی نماز خوانسا کیرہ ہمووخت اسکان مسیت ءِ تفوک آتا حق اٹی نیکی نوشتہ کننگسا مریک۔ اوپارے کہ دا مسیت میٹروروٹ انا تفنگ اٹ شہید کننگاسس و داسہ السی آسراتی و ضرورت ءِ مون آ تخسا دادے دُوارہ تفنگ انگ ءِ انشاء اللہ داڈٹ زوت آن زوت پوروی اسکان سرمریک۔ خصوصی کمکار وزیراعظم پاکستان ملک محمد عامر ڈوگر پارے کہ بھلو وخت اسے آن جوڑ مروک مسیت ہرانا بنداو ءِ تخنگانے داڑے الس نا آسراتی ءِ مون آتخسا دادے دُوارہ تفنگ انگ ءِ دامسیت نا دُوارہ پوسکن تفنگ کن فنڈ جاری کننگانے۔ انشاء اللہ زوت دانا کاریم پورو مریک و دُوارہ نمازی باآسانی دا مسیت رحمان و خاتم النبین اٹ باجماعت نماز ءِ خواننگ کیرہ ملک محمد عامر ڈوگر پارے کہ دامسیت نا تفنگ کنا باوہ ملک صلاح الدین ڈوگر کریسس و اینو دُوارہ دا مسیت ءِ اونا مار ملک عامر ڈوگر تففنگ ءِ۔ دوداٹی علامہ محمد فاروق خان سعیدی،مخدوم شعیب ہاشمی،ڈاکٹر محمد صدیق خان قادری،حاجی محمد اسلم ملک ایڈووکیٹ‘ اشرف ناصر خان،رانا عبدالجبار چیئرمین ایم ڈی اے،میاں جمیل احمد،شاہ زمان ‘قاری محمد ریاض گولڑوی ساڑی ئسر ۔بناو بنداو آن پد وزیر خارجہ مخدوم شاہ محمود قریشی کرفے۔
