اسلام آباد۔ 13 دسمبر (اے پی پی) گورنر پنجاب چوہدری محمد سرور پارینے کہ وزیراعظم عمران خان استیفہ ایتک و نئے حکومت چٹک، لانگ مارچ و استیفہ غاتا دھڑکو آن اپوزیشن حکومت آ زورشاغنگ نا بے سہب کوشست کننگ ءِ، پنچ سالہ آئینی مد ءِ پورو کننگ ننا آئینی و جمہوری حق ءِ ہراڑآن ہچ ءُ حالیت اسے ٹی پدی مفنہ۔ او یک شنبے نادے آ گورنر ہاؤس لاہور اٹی تحریک انصاف نا پنجاب اسمبلی نا باسک میاں فیصل حیات، عبدالالحہ دستی و رفاقت علی تون اوار ایلوفتا کماشی ٹی اوڑدہی کروک آ ڈل اتون گپ وتران کریکہ۔ اوڑدہی ٹی گپ و تران اٹی گورنر پنجاب پارے کہ اپوزیشن نا جلسہ غاتا سیاست ءِلاہور تون اوار مچ آ پاکستان نا خلقت مسترد کرینے، اینو الس انتشار و پھسات نا سیاست کروک آتون آخا بلکن وزیراعظم عمران خان نا کماشی ٹی حکومت و اونا پالیسی تتون سلوک ءِ، نن پاکستان ءِ بدترین زرگزرانی ویل آتیان کشسا زرگزرانی وڑاٹ خواتہ مننگ آن بچفینن۔ اوپارے کہ پاکستان ءِ مون تروک ویل آتا بنداوی سوب مستین نا حکمران تا ارب آ ڈالر نا وام، کرپشن و ایلو ویل آک ءُ ولے نن قوم اتون وعدہ کرینن کہ اوفتے کرپشن، کبینی و بے روزگاری تون اوار ایلو ویل آتیان پورو نجات ترفنہ و حکومت تینا پالیسی تا سوب آن سرسہبی اٹ مون آ ہِننگ ءِ ولے اپوزیشن نا عزم ءِ ہچ ءُ حالیت اسے ٹی سرسہب مننگ کن ہلنگپک۔ گورنر پنجاب پارے کہ الس ننے پنچ سال حکومت نا مینڈیٹ تسنے، ہنداخاطرآن حکومت کننگ ننا آئینی و جمہوری حق ءِ و اپوزیشن جماعت آتا ہم جمہوری زمواری ءِ کہ او ملک ءِ نزوری نا گواچی کننگ نا سازش کننگ نا جاگہ غا 2023ء نا لس گچین کاری تا انتظار ءِ کیر، ولدا الس تینا وونٹ انا طاقت اٹ ہرادے مرضی اقتدار کن گچین کیر۔
