اسلام آباد۔ 13 دسمبر (اے پی پی) بنجائی وزیر داخلہ شیخ رشید احمد پارینے کہ ساڑی حکومت وزیراعظم عمران خان نا ولولہ انگیز کماشی ٹی تینا آئینی مد ءِ پورو کیک دُن کہ لاہور نا الس پاکستان ڈیموکریٹک موومنٹ(پی ڈی ایم) نا سیاسی جلسہ ءِ مسترد کرینے، ہرااوفتا تحریک انصاف آ پبی پت انا پیدوار شاہدی ءِ، اپوزیشن جماعت آک حکومت نا برخلاف مخلوق ءِ کشنگ اٹ پورو وڑاٹ بے سہب مسنو، اوفتا لاہور اٹ جلسہ اسہ پین فلاپ شو اس ئس۔ یک شنبے نادے آ نجی ٹی وی چینل تون گپ وتران کرسا اوپارے کہ پی ڈی ایم مسترد مروک ٹولہ ءِ ہرادے الس مہالو آن مسترد کرینے و آخبت اٹ ہم اوفتا انجام ہندامریک۔ اپوزیشن نا حکومت ءِ بٹگنگ نا خواہش اسُل پورو مفک۔ ساڑی حکومت تینا آئینی مد ءِ پورو کیک۔ اسہ سوج اسے نا ورندی ٹی شیخ رشید احمد پارے کہ جمعیت علمائے اسلام (ف) نا سروک مولانا فضل الرحمان تینا تران اٹی توہین آمیز زبان ءِ کاریم اٹ اتنگ ءِ، دا بابت قبائلی علاقہ غاتیٹی اونا تران اسہ درور اسے۔ اوپارے کہ ملک دشمنک ملک اٹی سرگرم ءُ و او ڈیہہ نا امن اٹ نزوری ودی کننگ نا کوشست کننگ ءُ۔ بنجائی وزیر پارے کہ اپوزیشن جماعت آتے اقتدارنا لنگڑی ءِو اولاہوراٹی اتوار بازار خلکر ولے الس اوفتا بازارنا بائیکاٹ کرسا اوفتا جلسہ ٹی بشخ ہلنگ آن انکار کرے۔
