اسلام آباد۔ 11دسمبر (اے پی پی) بھارتی سینئر سفارتکار ءِ دفترخارجہ غا بٹگنسا 9 دسمبر آ کوزہ گیر بھارتی فوج انا کنڈآن لین آف کنٹرول (ایل ا وسی) نا تتہ پانی سیکٹر اٹ جنگ بندی نا خارتس خلاف ورزی تیا برانز ریکارڈ کرفنگا۔ بھارتی فوج انا خارتس سم کاری ٹی 55 سال انا زالبول ٹھپی مس۔ جمعہ نادے آ ترجمان دفتر خارجہ نا رداٹ سینئر بھارتی سفارتکار ءِ دفترخارجہ غا بٹنگسا برانزی مراسلہ ءِ اونا دوٹی تس و پارے کہ کوزہ گیر بھارتی فوج ایل ا و سی و ورکنگ باؤنڈری نا پدریسہ خلاف ورزی کرسا آرٹلری، بھلو و خودکار سلہہ غاتا کمک اٹ لس شاری آبادی ءِ شست کننگ ءِ۔ بھارتی سفارتکار ءِ پاننگاکہ شاری آبادی ءِ دانستہ وڑاٹ شست کننگ است ہسونی، انسانی عظمت و وقار، جہانی انسانی حق و جہانی انسانی کانود آن اسُل چپ ءِ۔ بھارت نا کنڈآن جنگ بندی نا داخلاف ورزی تیان علاقائی امن و سلامتی ءِ سنگین خطرہ مون تروک ءِ ہرانا نتیجہ اسٹریٹجک غلطی نا دروشم اٹ پیش تمنگ کیک۔ بھارت اینخوسال اٹی2940وار جنگ بندی نا خارتس خلاف ورزی کرینے ہرافتے ٹی 27 بے گناہ شاری شہید و 247 ٹھپی مسنو۔ بھارتی سفارتکار ءِ معلومدار کننگا کہ ایل او سی آ بے چیٹی ٹی ودکی آن بھارت مقبوضہ کشمیر اٹی انسانی حق انا بھلا خلاف ورزی و بیدادی آن جہانی چکار ءِ اسہ کنڈ کننگ کپک۔ بھارت آ زور شاغنگاکہ او اِرا ہزار مسٹ نا جنگ بندی معاہدہ نا پاسداری ءِ کے، جنگ بندی نا خلاف ورزی تا دا واقعہ غاتا جاست وپاست کرفے، بھارتی فوج ءِ جنگ بندی نا شرف نا پرمان کے، ایل ا وسی و ورکنگ باؤنڈری آ اونا رداٹ امن ءِ برقرار تخے و اقوام متحدہ نا سلامتی کونسل نا قرارداد آتا رداٹ بھارت اقوام متحدہ نا فوجی مبصرین(یو این ایم او جی آئی پی) ءِ تینا کڑد ءِ ادا کننگ نا موکل ایتے۔
