اسلام آباد۔ 10 دسمبر (اے پی پی) پاک بحریہ کمبائنڈ ٹاسک فورس ۔ 151 نا کمانڈ ءِ سنبھالا، داکان مست دا کمانڈ ایلم ملک ترکی تون ئس، پاک بحریہ داکان مست ہم ہشت وار ٹاسک فورس۔ 151 نا کمانڈءِ سنبھالانے۔ ترجمان پاک بحریہ نا رداٹ بدلی کمانڈ نا دود کمبائنڈ میری ٹائم فورسز ہیڈکوارٹرز بحرین اٹ اڈ ہلک پاک بحریہ نا کموڈور عبدالمنیب ءِ کمبائی ئنڈ ٹاسک فورس۔ 151 نا پوسکن آ کمانڈر تعینات کننگانے۔ کموڈور عبدالمنیب تینا تران اٹی دزکش مروک آ کمانڈر کمبائنڈ ٹاسک فورس۔ 151 و اونا ٹیم انا خذمت آتا ستاءِ کرے و پارے کہ ڈیہہ ٹی امن و سوگوی کن پاک بحریہ ایلو ملک آتا بحری فوج اتون اواری اٹ کاریم کرسا کیک۔ کمبائنڈ ٹاسک فورس۔ 151کمبائنڈ میری ٹائم فورس آتا چاروکی ٹی تینا فرض ءِ سرتننگ ءِ۔ کمبائنڈ ٹاسک فورس۔ 151 میری ٹائم سیکورٹی، بحری قزاقی و سمندر اٹ دہشت گردی نا توننگ ءِ پک کیک۔ دود اٹی بحرین اٹ تعینات پاکستان و ترکی نا سفیر آتون اوار ایلو سفارتی و عسکری شخصیت آک ہم بشخ ہلکر۔
