اسلام آباد۔ 10 دسمبر (اے پی پی) وزیر خارجہ شاہ محمود قریشی پارینے کہ دنیا نا غٹ بھلا پارلیمان تے مقبوضہ جموں و کشمیر اٹی برجا انسانی حق انا بھلا خلاف ورزی تیا توار بڑز کننگ نا گرج ءِ۔ اینو جمہوریت نا علمبردار، جمہوریت ءِ نسخان تننگ ءُ۔ پنچ شنبے نادے آ انسانی حق انا جہانی دے و مقبوضہ کشمیر نا حالیت آتا بابت بیان اٹی وزیر خارجہ پارے کہ پاکستان تون اوار مچ آ دنیا ٹی اینو انسانی حق انا جہانی دے ءِ اڈتننگ انگءِ۔ نن ہیومن رائٹس نا جہانی ڈیکلریشن ءِ امنا کینہ، ولے اینو بھارت نا غیر کانودی کوزہ ٹی جموں و کشمیر اٹی دا ڈیکلریشن آ ملنڈ خلنگ انگ ءِ۔ اوپارے کہ 5 اگست 2019ء آن ہلیس اینو اسکان 101 زالبول آتا اجتماعی آبروریزی مس، 15 نا خڑک زالبول جنوزان مسر، چناتے پیلٹ گن آتا شست کننگ انگ ءِ۔ مقبوضہ جموں و کشمیر اٹی بنداوی انسانی حق ءِ سلب کننگانے ہموڑے پورو کمیونیکیشن بلیک آؤٹ ءِ۔ جہانی میڈیا ءِ رسینگ تفننگ انگ ءِ ولے ہراخبرآک بننگ ءُ او گڑتی نا سوب ءُ۔ وزیر خارجہ پارے کہ پاکستان غٹ زموار آتے حالیت آتیان معلومدار تخنگ نا کوشست کرینے۔ ای اقوام متحدہ نا سیکرٹری جنرل و سلامتی کونسل نا صدر ءِ پدریسہ حالیت آتیان معلومدار تخاٹ۔ اینو ہندوستان اٹی اقلیت آک سراپا برانز کننگ ءُ۔ بھارت نا سیکولر اسٹیٹ و غٹ آن بھلا جمہوریت مننگ نا تاثر بھاز بے وڑ زہمی مننگ ءِ۔ بھارت نا کنڈآن فالس فلیگ آپریشن نا خطرہ غان دنیا ءِ پدریسہ معلومدار کننگ اُن۔ وزیر خارجہ پارے کہ جہانی میڈیا تدوک آ اسہ سال اٹی داڑآ بھاز چکار کرینے و بھارت نا اصل دروشم ءِ دنیا نا مون آ پاش کرے ولے شاید پین چکار کننگ نا گرج ءِ۔ شاہ محمود قریشی پارے کہ درو، کنے اینو نا دے انا بابت برطانوی پارلیمنٹ نا 15 آن زیات باسک آتون ویڈیو کانفرنس اٹ گپ وتران نا موقع ملا۔ ہموڑے ہم ای پاریٹ کہ ہاؤس آف کامنز، ہاؤس آف لارڈز، یو ایس کانگریس و یورپی پارلیمنٹ تون اوار غٹ بھلا پارلیمان تے دا مقبوضہ جموں و کشمیر اٹ برجا انسانی حق انا بھلا خلاف ورزی تیا توار بڑز کننگ نا گرج ءِ۔ مچ آ دنیا ٹی رہینگوک 10 ملین نا خڑک کشمیری پردیسی، حکومت نا چکار ءِ داکنڈآ کرفنگ اٹ اہم کڑد ادا کننگ کیرہ۔ کورونا نا ارٹ میکو ریسہ بھاز سنگین ءِ 50 آن 70 مرک ہڑدے مننگ ءِ۔ اوپارے کہ اپوزیشن داحالیت آتے بایدے مون آ تخے۔ نن جلسہ غاتا برخلاف افن، ولے دنیا ننے دین انا حالیت و خطرہ غاتیان معلومدار کننگ ءِ۔ ارٹ میکو ہیت دادے کہ اگہ اپوزیشن قومی ویل آ ہیت کننگ خواہک تو ای ہندا پاوہ کہ ببو ہیت کبو۔ وزیر خارجہ پارے کہ اپوزیشن دا نظام ءِ نسخان تننگ اٹ لگوک ءِ۔ اینو ہرافک جمہوریت نا علمبردار مریرہ ہموفک جمہوریت ءِ نسخان تننگ ءُ۔
