پاکستان و کرغزستان نا اسہ ایلو تون خڑکی برادرانہ تعلقداری ءِ، پاکستان و کرغزستان نا خڑکی تعلقداری تیان پد ہم واپاری کچ کم ءِ، چیئرمین سینیٹ

اسلام آباد۔ 10 دسمبر (اے پی پی) چیئرمین سینیٹ محمد صادق سنجرانی پارینے کہ پاکستان و کرغزستان نا اسہ ایلو تون خڑکی برادرانہ تعلقداری ءِ، پاکستان و کرغزستان نا خڑکی تعلقداری تیان پد ہم واپاری کچ کم ءِ، ہڑتوم آ کنڈآتا واپاری کچ ءِ ودفنگ نا سخت گرج ءِ۔ دا خیال آتا درشانی ءِ او پنچ شنبے نادے آ کرغزستان اٹی اڈ ہلوک آ کانفرنس آن ورچوئل لنک انا کمک اٹ تران کرسا کرے۔ کانفرنس نا سرحال’’رابطہ کاری نا دور اٹی پاکستان وکرغزستان: شاہراہ ریشم نا کڑد‘‘ ءِ۔ چیئرمین سینیٹ پارے کہ کانفرنس نا سوب اہم معلومداری تیا گپ وتران نا موقع ملا۔ پاکستان و کرغزستان نا اسہ ایلو تون خڑکی برادرانہ تعلقداری ءِ ولے پاکستان و کرغزستان نا خڑکی تعلقداری تیان پد ہم واپاری کچ کم ءِ۔ اوپارے کہ ہڑتوم آ کنڈآتا واپاری کچ ءِ ودفنگ نا سخت گرجءِ۔ تین پہ تینی ہڑتوم آ کنڈآتا واپاری و اقتصادی معاہدہ غاتیا عملدرآمد ءِ پک کننگ نا گرج ءِ۔ ساڑی آ دور رابطہ کاری نا دور ءِ۔ چیئرمین سینیٹ پارے کہ ننے رابطہ کاری نا وارخواہی تیان فائدہ ہرفسا شونداری نا عمل ءِ مون آ دروئی مریک۔ بی آر آئی ڈٹ  نیامی ایشیائی ملک آتیکن اقتصادی راہداری آن پبی فائدہ ہرفنگ نا موقع فراوان کیک۔ سی پیک پاکستان کن ڈیہہ تون رابطہ کاری نا پوسکن ءُ وارخواہی ودی کرینے۔ سی پیک ڈیہہ کن اسہ گیم چینجر اسے نا وڑاٹ مون آ بسنے۔ اوپارے کہ سی پیک ڈٹ سینٹرل ایشیاء، سویلی ایشیاء، دے ٹکی نیامی، قطبی افریقہ  یورپ تون رابطہ کاری ٹی کلیدی کڑد ادا کیک۔ رابطہ کاری نا دا ڈٹ آن مسہ ارب آن زیات بندغ آتے فائدہ رسینگک۔ پاکسان اسہ پرامن ءُ ملک اسے و امن کن قربانی تسنے۔ پاکستان ڈیہہ ٹی امن، شونداری و شونہالی نا اہمیت ءِ پہہ مریک۔ صادق سنجرانی پارے کہ پاکستان اوغان امن عمل نا ہرکہول آ مخ تفی ءِ کرینے۔ ڈیہہ نا رابطہ کاری و کمکاری ءِ ودفنگ کن امن و سلامتی بھاز اہم ءِ۔ پاکستان نیامی ایشیائی ملک آتسکان رسینگ دوئی کننگ و اقتصادی و زرگزرانی ہڷ و تس اٹ ترندی اتنگ کن کوشست کننگ ءِ۔ اوپارے کہ پاکستان و کرغزستان اسہ ایلو نا ہڑتوم آ تعلقداری تے بھاز اہم تکرہ۔ ننے اقتصادی راہداری نا رداٹ زرگزرانی و اقتصادی شونداری کن اواری اٹ کوشست کروئی مریک۔ چیئرمین سینیٹ کانفرنس نا منتظمین و لاہور سینٹرفار پیش ریسرچ نا کوشست آتا ستاءِ کرے و پارے کہ کانفرنس نا اڈتننگ بھاز اہم وخت آ کننگانے۔ کانفرنس اٹ کرغزستان نا وزیر خارجہ، پارلیمنٹ نا باسک آک و آذربائیجان نا سفیر ہم بشخ ہلک۔