اسلام آباد۔ 10 دسمبر (اے پی پی) بنجائی وزیر انسانی حق شیریں مزاری پارینے کہ پاکستان تحریک انصاف نا حکومت انسانی حق انا بابت بھاز گام گیج کرے، چناو زالبول آتا رکھ و مظلوم تپہ نا حق اکن کاریم کرے، چنا و زالبول آ بیدادی نا بابت چندی پوسکن ءُ کانود جوڑ مس، جبری بے گواہ ئی و صحافی تا رکھ اکن بل تیاری نا ریسہ غاتیٹی ءِ، مخلوق اٹ اوفتا حق انا بارواٹ آگاہی ودی کننگ نا گرج ءِ۔ داخیال آتا درشانی ءِ او پنچ شنبے نادے آ انسانی حق انا جہانی دے انا وخت آ جاری کروک تینا اسہ ویڈیو کلہو اسے ٹی کرے۔ شیریں مزاری پارے کہ 10 دسمبر آ مچ آ دنیا ٹی انسانی حق انا جہانی دے ءِ اڈ تننگک، پاکستان اٹی ہم نن انسانی حق انا دے ءِ اڈ ایتنہ، پاکستان تحریک انصاف نا حکومت انسانی حق ءِ مون آ دننگ نا کوشست کرینے و کننگ ءِ، نن خاص وڑاٹ چنا و زالبول آتا رکھ و مظلوم تپہ نا حق اکن کاریم کرینن و مون آ ہم کینہ۔ اوپارے کہ چندی پوسکن ءُ کانود جوڑ مسنے ہرافتے ٹی چنا و زالبول آتیا جنسی بیدادی نابرخلاف پوسکن آ آرڈیننس ’’اینٹی ریپ آرڈیننس‘‘ و چناتیا بیدادی نا برخلاف زینب الرٹ نا کانود اوار ءِ۔ پی ایم سٹیزن پورٹل آ زینب الرٹ ایپ ہم جوڑ مسنے وخت اس کہ نیشنل کمیشن آن دی رائٹس آف چائلڈ ہم ٹہیفنگانے۔ اوپارے کہ زالبول آ بیدادی نا برخلاف ہم نن ایپ اس تیار کرینن ہراٹی زالبول آتے آسراتی تننگانے کہ اگہ او فون آ ہیت کننگ کپسہ تو او تینا فوج نا اسہ بٹن اس زور ایتر تو ایس او ایس میسج تعلقدار پولیس اسکان سرمریک۔ اوپارے کہ جبری گمشدگی تا برخلاف ہم نن اسہ کانود اس تیار کننگ اُن وخت اس کہ صحافی تا رکھ اکن بل اس تیار مسنے ہرادے زوت آن زوت کابینہ ٹی حتمی منظوری کن پیش کننگک و ولدا اونا اسمبلی آن منظوری ءِ ہلنگک۔ اوپارے کہ زالبول ءِ ننا کانود، آئین و اسلام اٹ میرات اٹ حق دوئی ءِ، نن داڑآ سختی اٹ عملدرآمد نا کوشست کننگ اُن تانکہ اسہ زالبول اس ہم میرات نا حق آن محروم مف۔ شیریں مزاری پارے کہ خواجہ سراتا بابت کانود اٹ نن ترمیم کننگ اُن، حکومت نا کوشست ءِ کہ کانود آ عملدرآمد کننگے، ہر شاری ءِ اونا حق آن معلومدار کننگے۔ اوپارے کہ بھاز انگاتے سمااف کہ اوفتا حق آک انت ءُ، اگہ اوفتے تینا حق انا بارواٹ معلوم مفک تو او تینا حق انا رکھ ءِ ہراوڑ کننگ کیرہ۔ او الس آن خواست کرے کہ او تینا ذہنیب ءِ بدل کیر، کس اسے اوفتا حق آن محروم کپس۔ کس اسے آ بیدادی کپس، خاص کر زالبول و چناتیا انتئے کہ داوڑ نئے بیرہ نم کانود ءِ پرغرے بلکن راج ءِ ہم بھس کیرے۔
