وڈی خوری راج انا نیزگار و نزور تپہ غاتے غٹ آن زیات زہمی کننگ ءِ، آئی ایم ایف

اسلام آباد۔ 10 دسمبر (اے پی پی) جہانی مالیاتی فنڈ پارینے کہ وڈی خوری راج انا نیزگار و نزور تپہ غاتے غٹ آن زیات زہمی کننگ ءِ، ملک آتے گچین انتظام و انصرام، شفافیت، احتساب، سرکاری خریدار آتا آن لائن سرجم و منی لانڈرنگ نا توننگ کون آ گام گیج آتے پک کروئی مریک۔ داہیت ءِ جہانی مالیاتی فنڈ انا منیجنگ ڈائریکٹر کرسٹالینا جارجیوا تدوک آ دے اینٹی کرپشن نا بابت ورچوئل کانفرنس آن تران کرساپارے۔ اوپارے کہ جان جوڑی، زرگزران و راج آ کورونا دین انا اثرآتیان دنیا نا اسہ ملک اس ہم رکھ متنے، دااسہ ہندن ءُ تنکی اسے ہرانا مستین اٹ درور ملیپک۔ اوپارے کہ کورونا نا دین آن زہمی زرگزران تا کمکاری کن جہانی مالیاتی فنڈ دمدستی ردعمل نا درشانی ءِ کرے۔ آئی ایم ایف ءِ 100 ملک آتا کنڈآن ہلہلہ ئی کمکاری نا درخواست موصول مس۔ اوپارے کہ ہراڑے آئی ایم ایف دمدستی کمکاری کن گام گیج کرے اوڑتون اوار اوار ملک آتے اسلوب حکمرانی گچین و احتساب ءِ پک کننگ آ زور شاغنگا۔ غٹ ملک آتیکن ننا کلہو بھاز ساف ءِ کہ تنکی نا دا دور اٹی بیرہ ہمو خڑچ آتے کننگے ہرا المی مریر۔ فنڈ آتے پامداری اٹ کاریم اٹ اتنگے و اوفتا رسید آتے رکھ تخنگے۔ نن احتساب ءِ گوہنگ خواپنہ، احتساب و شفافیت خاص کر تنکی نا دے تیٹی بھاز المی ءِ۔ اوپارے کہ وڈی خوری اسہ ہندن ءُ شکنجہ اسے ہر اراج انا نیزگار و نزور تپہ غاتے غٹ آن زیات زہمی کیک۔ انسانی جان و روزگار بچفنگ کن حکومتی گام گیج آتا وارخواہی آ دستیاب فنڈ آتا وڈی خوری ٹی زیان اسہ المیہ اسے۔ اوپارے کہ دارداٹ جہانی مالیاتی فنڈ سرکاری فنڈ انا گچین انتظام و انصرام،شفافیت، احتساب و سرکاری خریدار آتا آن لائن سرجم و منی لانڈرنگ نا توننگ کون آ گام گیج آتے پک کننگ آ زور شاغنگ ءِ۔ داآسانءُ کاریم اس اف، دُز و دروکروک آک سنبرینگوک مریرہ ، او ہندن ءُ کسر پٹرہ ہراڑآن فنڈ آتے ہمو جاگہ غاتیا گدریفرہ ہراڑے اوفتا گرج مفک، داحالیت آتیٹی سول سوسائٹی و ٹرانسپرنسی انٹرنیشنل کون آ ادارہ غاتااہمیت پین ودک۔