اسلام آباد۔ 10 دسمبر (اے پی پی) وزیراعظم نا خصوصی کمکار پٹرولیم ندیم بابر پارینے کہ حکومت توانائی نا بشخ اٹی اصلاحات اتنگ کن گچین گام گیج کننگ ءِ۔ 2025ء اسکان انرجی مکس اٹ قابل تجدید توانائی نا بشخ 20 درسد و 2030اسکان 30 درسد اسکان ودفنگک، و پن بجلی نا پیدوار اٹی 30 آن 40 درسد نا ودکی مریک، پاکستان سولر پینلز و ونڈٹربائن تینٹ تیار کیک۔ داخیال آتا درشانی ءِ او پاکستان اٹ برطانیہ نا ہائی کمشنر ڈاکٹر کرسٹین ٹرنر تون گپ وتران کرسا کرے ہراپنچ شنبے نادے آ داڑے اوڑتون اوڑدہی کرے۔ اوڑدہی ٹی توانائی سیکٹرآ گپ وتران کننگا۔ اوڑدہی ٹی ندیم بابر پارے کہ برٹش کمپنی تا پاکستان نا توانائی بشخ اٹی زرکاری کن است خواہی نا ستاءِ کینہ۔ پاکستان سولر پینل و ونڈٹربائن تا اسمبلی و مینوفیکچرنگ تینٹ کیک۔ اوپارے کہ قابل تجدید توانائی ڈٹ آتیان ملک اٹی اڑزآن و ماحول دوست توانائی دُوبریک۔ توانائی ڈٹ آتیان ملک اٹی روزگار نا بھلو وارخواہی اس ودی مریک اوپارے کہ حکومت گڑاس درملکی کمپنی تا کمک اٹ قابل تجدید ڈٹ آتیکن سولر پینل و ونڈٹربائن تا تیاری نا ڈٹ انا بناءِ کننگ آ سجفنگ ءِ۔ برطانوی کمپنی تے دا ڈٹ آتیٹی بشخ ہلنگ نا سلہ خلینہ۔ داوخت آ برطانوی ہائی کمشنر پارے کہ برطانیہ نا پاکستان کن 1.5 بلین ڈالر نا ایکسپورٹ کریڈٹ آسراتی ساڑی ءِ ہرا ایلو پاکستانی ڈٹ آتیٹی کاریم اٹ اتنگ مریک۔ اوپارے کہ پاکستان اٹ توانائی نا بشخ اٹ زرکاری نا بھلو وارخواہی اس ساڑی ءِ۔
