اقوام متحدہ۔ 10 دسمبر (اے پی پی) اقوام متحدہ نا جنرل اسمبلی سلہہ غاتا چٹفنگ نا بابت پاکستان نا پیش کروک 4 قرارداد آتے منظور کرے ہرا پاکستان نا جہانی و علاقائی کہول آ امن و سلامتی نا کوشست آتا اعتراف ءِ۔ دا قرارداد آتا مخ تفی ءِ جنرل اسمبلی نا سلہہ غاتا چٹفنگ کمیٹی نا 193 باسک آک کریر ہرافک پاکستان نا کوشست آتا پبی است بڈی ءِ کرسا دا قرارداد آتے منظور کریر۔ 4 قرارداد آن 3 قرارداد علاقائی سلہہ غاتا چٹفنگ، علاقائی و ذیلی علاقائی کہول آ روایتی سلہہ غاتا کنٹرول تون اوار اوار علاقائی و ذیلی علاقائی رداٹ پت سازی نا گام گیج (سی بی ایم) ءِ مون آ دننگ نا بابت ئسر وخت اس کہ پاکستان نا پیش کروک چارمیکو قرارداد غیر جوہری ریاست آتیکن امن و سلامتی ءِ پک کننگ نا بابت ئس۔ پاکستان نا اسہ قرارداد نا سرحال’’ جوہری سلہہ غاتا کاریم اٹ اتنگ یا خطرہ نا برخلاف غیر جوہری ریاست آتیکن موثر جہانی بست وبند آتے پک کننگ نا فیصلہ سازی‘‘ ئس ہرانا حق اٹی 125وخت اس کہ مخالفت اٹ اسہ وونٹ اس ہم تمتوولے 62 باسک آک رائے شماری ٹی بشخ ہلتوس۔ ارٹ میکو قرارداد نا سرحال’’ علاقائی و ذیلی علاقائی کہول آ روایتی سلہہ غاتا کنٹرول‘‘ ئس ہرانا حق اٹی 183 وونٹ تما وخت اس کہ دا قرارداد نا مخالفت ءِ بیرہ بھارت کرے وخت اس کہ 4 ملک ہچ ءُ سلاہ اس تتوس۔ مسٹ میکو قرارداد نا سرحال’’ علاقائی سلہہ غاتا چٹفنگ‘‘ و چارمیکو قرارداد علاقائی و ذیلی علاقائی کہول آ پت سازی نا گام گیج ‘‘ ئس ہرافتے امنائی سلاہ اٹ منظور کننگا۔ سفارتی عملہ پارے کہ جنرل اسمبلی نا کنڈآن پاکستان نا قرارداد آتا منظوری علاقائی و جہانی سلہہ غاتا چٹفنگ نا مسخت ءِ مون آ دننگ تون اوار اوار جہانی امن و سلامتی ءِ سوگوی تننگ کن پاکستان نا عزم و کوشست آتا اعتراف ءِ۔ اوپارے کہ دنیا نا چندی ڈیہہ خاص وڑاٹ سویلی ایشیاء ٹی بے پتی ٹی ودکی و ودوک آ بے چیٹی ٹی امن و سلامتی ءِ سوگو کننگ کن سلہہ غاتا چٹفنگ نا علاقائی نقطہ نظر زیات مطابقتا و اہمیت اختیار کرینے و جنرل اسمبلی داہیت ءِ بھلو وخت اسے آن امنا کیک کہ جہانی امن و سلامتی نا سیبو علاقائی و ذیلی علاقائی سوگوی آٹے۔ سفارتی عملہ پارے کہ علاقائی کہول آ دابابت گام گیج آن سلہہ غاتا چٹفنگ و سلہہ غاتیا کنٹرول نا کوشست و اوفتیا عملدرآمد ءِ سوگوی ملک۔
