اسلام آباد۔ 10 دسمبر (اے پی پی) صدر مملکت ڈاکٹر عارف علوی پارینے کہ ساڑی حکومت پائیدار شونداری ہدف 2030 ء نا رداٹ نیزگاری ٹی کمتی و جان جوڑی نا آسراتی تیٹی گچینی اتنگ کن سنبرینگوک ءِ، مُر انگا علاقہ غاتیٹی جان جوڑی نا آسراتی تا فراوانی اہمیت تخک، لمہ و چنانا غذائی کاختی نا مون ءِ توننگ کن پروگرام بناکننگانے، لمہ نا جان جوڑی کن چنانا ودی کننگ اٹ وقفہ المی ءِ۔ داخیال آتا درشانی ءِ او پنچ شنبے نادے آ قومی زچگی سروے نا بابت ویبنار آن تران کرسا کرے۔ اوپارے کہ جان جوڑی و تعلیم نا بشخ اٹی اسہ وڑ رسینگ اہم ءِ، شیفکو کہول آ نیشنل ہیلتھ سروسز، پرائمری ہیلتھ و سیکنڈری ہیلتھ انا آسراتی نا فراوانی المی ءِ۔ اوپارے کہ گچین ڈٹ بندی کن مستند حساب وکتاب نا مننگ المی ءِ۔ ملک اٹی ہیلتھ وزٹرآتا گچین نظام اس ساڑی ءِ ہرافتا کمک اٹ پک معلومداری ہلنگ مریک صدر مملکت پارے کہ وزیراعظم عمران خان نا کماشی ٹی ساڑی حکومت جان جوڑی نا بشخ انا گچینی کن سنبرینگوک ءِ۔ وزیراعظم عمران خان شوکت خانم کینسر ہسپتال اس جوڑ کرے۔ او جان جوڑی نا بشخ اٹی بھاز است خواہی تخک۔ اواقتدار اٹی بننگ آن پد تینا اولیکو تقریر اٹی لمہ و چنا نا جان جوڑی نا بابت جان جوڑی آسراتی تا فراوانی نا عزم ظاہر کرے۔ اوپارے کہ آبادی ٹی کمتی آن جان جوڑی نا آسراتی اسکان آسان رسینگ ءِ پک کننگ مریک۔ جان جوڑی نا گچین آسراتی تا فراوانی آن مرک آتیٹی کمتی مریک۔ لمہ و چنانا گچین جان جوڑی کن گچین خور المی ءِ۔ صدر مملکت پارے کہ ہرالمہ غاک تینا چناتے زوت پاڷ ہلفرہ اوڑآن اوفتے جان جوڑی نا چندی ویل آتا مون تروئی تمک و چناہم غذائی کاختی نا گواچی مریک۔ صدر مملکت پارے کہ وزیراعظم عمران خان آبادی نا بات ٹاسک فورس انا سروک جوڑ کرینے۔ ہراتم آن اودے دا زمواری تننگانے او دا بابت عالم دین تتون اوار زند انا چندی بشخ آتیان تعلق تخوک آ بندغ آتون سلابت کننگ ءِ۔ اوپارے کہ حمل اٹ مناسب وقفہ غان ہم لمہ و چنانا جان جوڑی آ مثبت زہمی تمک۔ لمہ ءِ تینا چناءِ 24 تُو پاڷ کنفے داڑآن چناغذائی کاختی نا گواچی مفک و لمہ ءِ ہم جان جوڑی نا ویل مون تروئی تمپک وخت اس کہ داڑآن حمل نا وقفہ نا دورانیہ ہم ودک۔ لمہ نا پاڷ انا ہچ ءُ بدل اس اف۔ اوپارے کہ ساڑی آ حکومت پائیدار شونداری ہدف 2030ء نا رداٹ نیزگاری ٹی کمتی و جان جوڑی نا آسراتی تیٹی گچینی کن سنبرینگوک ءِ۔ اوپارے کہ نن وار وار آ دوتے سلسا و حفظان صحت نا اصول آتیا عمل کرسا ہلوک آ مرض آتیان رکھ مننگ کینہ۔ اوپارے کہ مُر انگا علاقہ غاتیٹی زچگی ٹی مرک آتا کچ 26 درسد زیات ءِ۔ جان جوڑ زند اکن گچین خور انا مننگ المی ءِ۔ حکومت راج اٹ جان جوڑی نا بابت ویل آتا بابت آگاہی ودی کننگ کن عالم دین تتون اوار زند انا ایلو بشخ آتیان تعلق تخوک آ بندغ آتون رابطہ ٹی ءِ۔ آبادی نا مون ءِ توننگ کن اہم گام گیج کننگانے۔ اوپارے کہ کورونا دین اٹی ٹیلی ہیلتھ سسٹم و انٹرنیٹ نا کمک اٹ رابطہ غاتے مون آ دننگانے ہرا مزور گڑاس سوب آتیا تینا خاہوت ءِ ڈاکٹر آن چیک اپ کرفنگ کپک او ٹیلی ہیلتھ سسٹم آن فائدہ ہرفنگ کیک۔ کورونا دین اٹی جان جوڑی و تعلیم نا بشخ آتیٹی انٹرنیٹ نا کاریم اٹ اتنگ اٹ ودکی مسنے۔ اوپارے کہ وزیراعظم عمران خان نا کماشی ٹی کورونا دین اٹی معلومداری نا وخت آ فراوانی نا کمک اٹ جان جوڑی نا ویل آتون جوان وڑاٹ مون تننگ کن گچین حکمت عملی اس اختیار کننگانے۔
