اسلام آباد۔ 10 دسمبر (اے پی پی) وزیراعظم عمران خان نا کماشی ٹی راوی اربن ڈویلپمنٹ اتھارٹی و پاکستان آئی لینڈ ڈویلپمنٹ اتھارٹی نا ورکنگ پڑک نا دیوان اڈ ہلک۔ دیوان اٹی بنجائی وزیر حوالکاری و شینکاری سینیٹر شبلی فراز، بنجائی وزیر سمندری امور سید علی حیدر زیدی، خصوصی کمکار سیاسی مواصلات ڈاکٹر شہباز گل چیئرمین نیا پاکستان ہاؤسنگ اتھارٹی لیفٹیننٹ جنرل (ر) انورعلی حیدر، ڈپٹی چیئرمین نیا پاکستان ہاؤسنگ اتھارٹی میجر جنرل (ر) امیر اسلم خان، چیئرمین پاکستان آئی لینڈ ڈویلپمنٹ اتھارٹی عمران امین بشخ ہلکر۔ داکان بیدس گورنر سندھ عمران اسماعیل، سلاہکار وزیراعلیٰ پنجاب ڈاکٹر سلمان شاہ، خصوصی کمکار وزیراعلیٰ پنجاب ڈاکٹر فردوس عاشق اعوان، چیئرمین راوی اربن ڈویلپمنٹ اتھارٹی راشد عزیز، چیف سیکرٹری پنجاب و تعلقدار بڑزکو آفیسر آک ویڈیو لنک انا کمک اٹ بشخ ہلکر۔ وزیراعظم آفس نا میڈیا ونگ انا کنڈآن جاری بیان نا رداٹ دیوان اٹی وزیراعظم ءِ چینی حکومت و کمپنی تا کنڈآن ڈٹ اٹی 3 ارب ڈالر نا زرکاری ٹی است خواہی نا بارواٹی معلومدار کننگا و داہم پاننگاکہ داٹی ہچ وڑنا وام اوار اف۔ داکان بیدس وزیراعظم ءِ اے این جی سی سی نا کنڈآن پنچ ارب ڈالر نا شراکتی زرکاری نا پیش کش نا بارواٹی ہم معلومدار کننگا۔ راوی سٹی ڈٹ آ پیش رفت ءِ پین ترند کننگ کن بورڈ اسے ٹہیفنگا و ڈٹ آ جنوری آن کاریم بناکننگ ءِ۔ وزیراعظم داہیت آ زور شاغا کہ راوی سٹی ڈٹ تاریخی وڑاٹ تینا نوعیت نا پاکستان نا غٹ آن یکتا و بھلا ڈٹ ءِ ہرا لاہور نا ودوک آ ویل آتا ایسر فراوان کیک۔ اومستی پارے کہ دا ڈٹ انا پوروی آن لاہور نا شاری تے نئے بیرہ کنوئی ءُ ساف دیر، سیوریج نا جوان بست وبند، ساف وشفاف چاگڑد و ایلو پوسکن آ آسراتی تیان شُپ ہنکینی آسراتی دُوبریک بلکن بھلو کچ اسے آ پیشن نا زرکاری آن روزگار نا بھلو وارخواہی و ہندی و قومی زرگزران خاص وڑاٹ صنعت آتے شون ملک۔ پاکستان آئی لینڈ ڈویلپمنٹ اتھارٹی نا بابت وزیراعظم ءِ پاننگاکہ چاگڑدی و ماسٹر پلان نا اسٹڈیز نا بناءِ ہم جنوری آن مننگ والا ءِ داڑتون اوار اوار این جی او تتون شریداری ٹی جزیرہ غاتون گنڈوک مچھی ہلوک آتے روزگار و سمندری حیات نا رکھ اکن اسہ پروگرام اس شین تننگ انگ ءِ۔ وزیراعظم عمران خان بنڈل آئی لینڈ آ مروک آ پیش رفت آ است جمی نا درشانی ءِ کرسا داہیت آ زور شاغا کہ دا ڈٹ انا سرسہبی کن غٹ اسٹیک ہولڈر آتے پت اٹ ہلسا کاریم کننگک۔
