سیالکوٹ۔ 09 دسمبر (اے پی پی) وزیراعظم عمران خان پارینے کہ حکومت صنعتی سرجزآتا مون آ دننگ، کاروبار اٹ آسانی ودی کننگ، کاروباری برادری ءِ آسراتی فراوان کننگ مُرمُر انگا علاقہ غاتا شونداری و مخلوق ءِ نیزگاری آن کشنگ آ پبی چکار کرینے، کاروباری برادری نا ایف بی آر، سٹیٹ بینک و ایلو محکمہ غاتا بابت ویل آتے ایسر کینہ۔ السی ویل آتا ایسری کن بلدیاتی نظام اس اتنگ اُن، کورونا نا دین انا حالیت آتیٹی زرگزرانی سرجزآتے برجاتخنگ اہم ءُ چیلنج اس ئس، حکومت پبی گام گیج آتے اٹ برجا کھاتہ غاتا نسخان نا مون ءِ تورے۔ کورونا دین انا اولیکو ریسہ ٹی پورو لاک ڈاؤن نا خواست کروک آ اپوزیشن اینو جلسہ کننگ ءِ، کورونا غان بچنگ کن رکھی گام گیج آتیا عملدرآمد المی ءِ، الس ماسک بینے و رکھی گام گیج آتیا عمل کے، سہی وڑاٹ رکھی گام گیج اختیار کننگتو تو سیڷ اٹی مشکل پیش بریک۔ داخیال آتا درشانی ءِ او چار شنبے نادے آ سیالکوٹ اٹی فضائی کمپنی ایئر سیال نا بناءِ کننگ آن پد کاروباری برادری آن تران کرسا کرے۔ وزیراعظم عمران خان پارے کہ ملکی شونداری ٹی سیالکوٹ نا بزنس کمیونٹی نا اہم ءُ کڑد اسے۔ آخبت اٹ سیالکوٹ برآمدی سرجزآتا وت مریک۔ اودے آخبت اٹ تینا ایئر لائن نا گرج تموک ئس، ہنداخاطرآن اوفک داڑے مہالو آن اسہ شاندار بالی پٹ و ولدا تینا ایئر لائن ءِ جوڑ کرینو انتئے کہ کاروباری تپہ جوان وڑاٹ چاہک کہ او امر ایئر لائن ءِ چلیفنگ کیرہ۔ ایئر سیال نا بناآن پی آئی اے و ایلو چاگڑدی کمپنی تتون مقابلہ نا فضاودی مریک و مسافر آتے آسراتی ملک۔ وزیراعظم پارے کہ کورونا نا حالیت آتیٹی زرگزرانی سرجزآتے برجاتخنگ اہم ءُ چیلنج اس ئس۔ دین ءِ توننگ کن لاک ڈاؤن جوان انگا کسر ءِ۔ اللہ نا فضل و کرم و الس نا کمک اٹ کورونا نا اولیکو ریسہ ٹی حالیت آک کنٹرول اٹ مسر۔ گچین حکمت عملی آ ڈبلیو ایچ او پاکستان نا شمار ہمو 7 ملک آتیٹی کرینے ہرافک گچین وڑاٹ کورونا نا حالیت آتون مون تننگ کن گام گیج کریر۔ روزگار، کاروبار،و تینا مخلوق ءِ کورونا آن بچفین۔ وزیراعظم پارے کہ اپوزیشن ہمووخت آ لاک ڈاؤن کپننگ آ حکومت آ تنقید کریکہ ولے مہالو نا وار پورو لاک ڈاؤن نا خواست کروک آ اپوزیشن اینو جلسہ کرسا کننگ ءِ۔ کورونا نا ارٹ میکو ریسہ ٹی رکھی گام گیج آتیا عملدرآمد المی ءِ۔ سہی وڑاٹ رکھی گام گیج اختیار کننگتو تو سیڷ اٹی مشکل پیش بریک۔ اوپارے کہ امریکہ ٹی ہر چار دے اٹی ہنداخہ بندغ کوروناآن زوال کرینو اخس کہ پاکستان اٹی 7 تُو اٹی متنے۔ داوخت آ کیلفورنیا، انگلینڈ و اٹلی ٹی لاک ڈاؤن نا حالیت ءِ۔ الس آن خواست ءِ کہ ماسک بینر و رکھی گام گیج آتیا عمل کیر انتئے کہ ماسک بیننگ آن کورونا ناتالانی ءِ توننگ مریک۔ وزیراعظم پارے کہ حکومت کاروباری تپہ ءِآسراتی تا فراوانی کن سنبرینگوک ءِ و کاروباری تپہ نا است بڈی ءِ کننگ خواہک تانکہ کاروباری سرجزآک ودر۔ 60 نا دہائی ٹی پاکستان شون ہلککہ ولے 70 نا دہائی نا منفی پالیسی تا سوب آن صنعتی شونداری زہمی مس۔ صنعتی شونداری کن بزنس کمیونٹی ءِ غٹ آسراتی تا فراوانی، اڑاند آتا چٹفنگ و کاروبار اٹ آسانی ودی کننگ حکومت نا اولیت ءِ و حکومت نا غٹ آن بھلا مسخت دادے کہ مخلوق ءِ نیزگاری آن کشنگے و گلگت بلتستان، مسکوہی فاٹا، اوار مروک ضلع، بلوچستان و پنجاب نا ضلع ڈیرہ غازی خان کون آ ہمو پسماندہ علاقہ غاتے شون تننگے ہرا شونداری ٹی پدی ءُ۔ پائیدار شونہالی کن اسہ وڑ شونداری المی ءِ۔ چین تینا شیفکو تپہ ءِ آسراتی فراوان کرے و 70 کروڑ بندغ ءِ نیزگاری آن کشا۔ سی پیک نا اسہ مسخت ہم دیکی چین انا شونداری ءِ انتئے کہ چین دا علاقہ ءِ گوادر نا کمک اٹ سمندری واپار ءِ مون آ دننگ خواہک۔ وزیراعظم پارے کہ ننا کوشست ءِ کہ ہرا علاقہ غاتیٹی احساس محرومی ءِ ہموڑے آسراتی تننگے۔ نیزگار بندغ آتیکن پالیسی جوڑ کننگے و ہندا مسخت کن احساس پروگرام نا بناءِ کننگا ولے داڑکن دولت نا فراوانی نا ہم المی ءِ انتئے کہ دولت آن بیدس نیزگاری ءِ چٹفنگ مفک۔ اوپارے کہ ہراتم ساڑی حکومت اقتدار اٹ بس تو زرمبادلہ نا کوڑیک کم ئسر و زرتننگ کن ننتون زر الوکہ۔ ننا برآمد آک کم و درآمد آک زیات ئسر۔ نن برآمد آتیٹی ودکی کننگ خوانہ۔ ننا کوشست ءِ کہ سیالکوٹ نا صنعت ءِ ہروڑاٹ آسراتی فراوان کین۔ سیالکوٹ، گوجرانوالہ، گجرات، وزیر آباد، کراچی و فیصل آباد نابرآمد آتے ودفنگ کن کمک کننگے۔ چنکا و نیامئی درجہ نا کاروبار غٹ آن زیات روزگار ودی کیک۔ ورناک ننا آبادی نا بھلو بشخ اسے ءُ اوفتے روزگار ناوارخواہی فراوان کروئی ءِ۔ دا چرجوئی ٹی وزیراعظم آفس نا رداٹ بنجائی وزیر صنعت و پیداوار حماد اظہر و ٹاسک فورس اڑاند آتے مر کننگ و چنکا و نیامئی درجہ نا صنعت کن آسانی ودی کننگ کن گام گیج کیرہ۔ وزیراعظم پارے کہ حکومت پبی گام گیج آتے اٹ برجاکھاتہ غاتا نسخان نا مون ءِ تورے۔ اوپارے کہ سیالکوٹ اٹ پوسکن ءُ یونیورسٹی اسے نا جوڑ کننگ نا ڈٹ ءِ، دا یونیورسٹی ٹی مصنوعی ذہانت، ٹیکنالوجی و ایلو بشخ آتیا چکار مریک۔ ہنداوڑ نن ہری پور اٹ آسٹریا نا کمک اٹ یونیورسٹی اس جوڑ کرینن ہراڑے جہانی آب انا وڑ انجینئرز ودی مریک۔ وزیراعظم پارے کہ کاروباری برادری برادری نا ایف بی آر، اسٹیٹ بینک و یوٹیلیٹی کمپنی تا بابت ویل آتے ایسر کننگک السی ویل آتا ایسری کن بلدیاتی نظام اس اتنگ اُن۔ شارتیٹی سٹی گورنمنٹس جوڑ کننگک ومیئر تا گچین کاری براہ راست مریک و اپریل آن پد اوفتا گچین کاری مریک ہرا تینا ویل آتے تیںٹ ایسر کننگ کیرہ۔
