اسلام آباد۔ 09 دسمبر (اے پی پی) نیشنل کمانڈ اینڈ آپریشن سینٹر نا سروک بنجائی وزیر ڈٹ بندی، شونداری، اصلاحات و خصوصی گام گیج اسد عمر پارینے کہ جمہوری نظام نا مطلب دا اف کہ سیاسی لیڈر داوڑنا فیصلہ کیر ہراڑآن زند و روزگار خطرہ ٹی تمے، اولیکو ریسہ نا مقابلہ ٹی کورونا نا ارٹ میکو ریسہ بھاز خطرناک ءِ، اگہ مخلوق رکھی گام گیج اختیار کتو تو شاید ہفتہ غان پد گڑتی ءِ کہ پین بندش خلوئی تمے، ہسپتال آتیٹی کوویڈ۔ 19 نا ناجوڑ آتا کچ اٹ ترندی اٹ ودکی مرسا کننگ ءِ و مرک آک ودنگ ءُ۔ داخیال آتا درشانی ءِ او چار شنبے نادے آ این سی او سی ٹی میڈیا بریفنگ اٹی کرے۔ بنجائی وزیر پارے کہ اگہ مخلوق رکھی گام گیج اختیار کتو تو شاید ہفتہ غان پد گڑتی ءِ کہ پین بندش خلوئی تمے۔ ہسپتال آتیٹی کورونا ناجوڑ آتا کچ اٹ ترندی اٹ ودکی مرسا کننگ ءِ و مرک آک ودنگ ءُ۔ اوپارے کہ تینا خاطر، تینا خاہوت و تینا دوست آتا خاطر رکھی گام گیج آتیا عمل کیر۔ کورونا نا اولیکو ریسہ ٹی دنیا پاکستان نا حکمت عملی نا ستاءِ کرے، ننے آخبت ءِ مون آ تخسا حکمت عملی اس اختیار کروئی ءِ، 2 تُو اٹی کورونا ساڑی آ دے تیٹی کورونا غان مثبت کیس و مرک آتیٹی 4 گناودکی مس۔ اسد عمر پارے کہ اوسطا 60 مرک مننگ ءِ، کورونا ایس او پی تیا مست آنبار عملدرآمد مفننگ ءِ، ریسٹورنٹ و شادی ہال تیٹی کُن و خور تیا پابندی نا فیصلہ مشکل ئس، بند مننگ آن تعلیمی ادارہ غاتا نظام و روزگار زہمی مس۔ ہراسیکٹر آتے بند کننگا اوفتا ریلیف کن زوت کاریم مریک، رکھی گام گیج آتیا عملدرآمد نا اسہ وڑ کلہو ہِنپننگ ءِ، پاکستان اٹ سد آ ہیلتھ ورکر کورونا غان زہمی مسر۔ جمہوریت نا نظام الس نا شونداری و شونہالی کن مریک۔ اوپارے کہ جمہوری نظام داخاطرآن مفک کہ الس نا زند خطرہ ٹی تمے۔ ہراتم راہشونک پارہ کہ جلسہ تون دین انا تعلق اف تو داڑآن نسخان مریک۔ الس نا زند انا رکھ اکن حکومت مشکل فیصلہ کرے، اوپارے کہ السی مچی تیٹی پابندی آ عملدرآمد مفننگ ءِ، ہراتم لیڈرآک پارہ کہ جلسہ تون دین انا تعلق اف تو داڑآن نسخان مریک۔ اولیکو ریسہ نا مقابلہ ٹی کورونا نا ارٹ میکو ریسہ ٹی کلہو اسہ وڑ ہِنپننگ ءِ۔ اوپارے کہ 12 اکتوبر آ کورونا کیس آک 2 درسد ئسر ولے داسہ دا کچ 4 درسد ءِ۔ کورونا نا معاملہ ٹی جہانی کہول آ دنیا پاکستان نا درور تننگءِ ولے داسہ ارٹ میکو ریسہ ٹی ننا سیاسی لیڈرشپ ناپختگی نا درشانی ءِ کننگ ءُ۔ داکان بیدس بنجائی وزیر تینا ٹویٹ اٹی پارے کہ پی ڈی ایم والاک ننا ہیت آتیا خف توپسہ تو اعتزاز احسن نا ہی ہیت آ خف توریر کہ او انت سلاہ تننگ ءِ۔
