اسلام آباد۔ 09 دسمبر (اے پی پی) وزیر خارجہ مخدوم شاہ محمود قریشی پارینے کہ پاکستان و سعودی عرب نا نیام اٹ تاریخی برادرانہ تعلقداری ءِ۔ ہڑتوم آ ملک آتا نیام اٹ کثیر الجہتی بشخ آتیٹی کمکاری نا وارخواہی ساڑی ءِ ہرافتیان فائدہ ہرفنگ نا گرج ءِ۔ داہیت آتے او پاکستان اٹ تعینات سعودی سفیر نواف بن سعدالمالکی تون گپ وتران کرسا پارے ہرا چارشنبے نادے آ وزارت خارجہ ٹی اوڑتون اوڑدہی کرے۔ وزیر خارجہ پارے کہ نائیجر اٹ اڈ ہلوک آ او آئی سی وزرائے خارجہ کونسل نا چل ءُ ہفت می دیوان نا وخت آ سعودی وزیر خارجہ شہزادہ فیصل بن فرحان آل سعود تون اوڑدہی و ہڑتوم آ کنڈآتا باندات آ گپ وتران نا موقع ملا۔ پاکستان نا کنڈآن او آئی سی وزرائے خارجہ کونسل نا دیوان اٹی کشمیر نا بابت پیش کروک قرارداد نا مخ تفی آ سعودی وزیر خارجہ و سعودی حکومت نا است انا حب اٹ منت وار اُن۔ پاکستان و سعودی عرب نا نیام اٹ تاریخی برادرانہ تعلقداری ءِ۔ پاکستانی تا بھلو کچ اس تدوک آ کیہی دہائی آن سعودی عرب اٹ رہینگ انگ ءُ و سعودی عرب نا شونداری و شونہالی ٹی تینا کڑد ءِ ادا کننگ ءُ۔ شاہ محمودقریشی پارے کہ پاکستان و سعودی عرب نا نیام اٹ کثیر الجہتی بشخ آتیٹی ہڑتوم آ کنڈآتا کمکاری ءِ مون آ دننگ نا بھاز انگا وارخواہی ساڑی ءِ ہرافتیان فائدہ ہرفنگ نا گرج ءِ۔ نیامے ڈیکلریشن اٹ او آئی سی نا مقبوضہ جموں و کشمیر نا بابت اصولی موقف نا درشانی ستاکڑزک۔ اسلاموفوبیا نا بابت پاکستان نا کنڈآن پیش کروک آ قرارداد آ سعودی عرب نا مخ تفی نا منت وار اُن۔ وزیر خارجہ پارے کہ پاکستان خلیجی ڈیہہ ٹی جھیڑہ غاتا پرامن ایسری نا کوشست آتا ستاءِ کیک۔ پاکستان، اتحاد امہ غا پورو یخین تخسا مسلم ملک آتا نیام اٹ ہڑتوم آ کنڈآتا باندات ءِ پرامن وڑاٹ مذاکرات نا کمک اٹ ایسر کننگ نا مخ تف ءِ۔ وزیر خارجہ پارے کہ نن 2021ء نا بناٹی، ریاض اٹی گمانی، پاک سعودی سپریم کوآرڈینیشن کونسل نا ارٹ میکو دیوان نا اڈتننگ نا چاری اُن۔ فاٹف فورم آ سعودی عرب نا کنڈآن پاکستان نا پدریسہ مخ تفی ستاکڑزک۔
