سیالکوٹ۔ 09 دسمبر (اے پی پی) وزیراعظم نا خصوصی کمکار شہباز گل پارینے کہ حکومت زرگزرانی شونداری ٹی پوریاگر برادری نا کڑد انا متعرف ءِ وپاکستان نا زرگزرانی شونداری ٹی سیالکوٹ نا اہم ءُ کڑد اسے۔ اوپارے کہ وزیراعظم نا سیالکوٹ دورہ نا فوکس کاروباری شخصیت و ورناک ءُ۔ ہراتم کاروبار ودک تو بنداوی وڑاٹ اوڑآن روزگار اٹی ودکی مریک و اگہ ڈیٹاءِ ہُرن تو پاکستان نا آبادی نا بھلا بشخ ورناتیا تالان ءِ و ننے اوفتے وارخواہی فراوان کروئی ءِ اگہ نن اوفتے وارخواہی فراوان کینہ تو او ننا طاقت مریرہ و اگہ نن داوڑ کپنہ تو ہندا ننا غٹ آن بھلا نزوری نا سوب مریک۔ سیالکوٹ اٹی میڈیا تون گپ وتران کرسا اوپارے کہ وزیراعظم اولیکو دے آن الس ءِ روزگار نا فراوانی کن متاماری کننگ ءِ، اگہ ہُننگے تو ملکی تاریخ اٹ اولیکو وار ساڑی حکومت ایکسپورٹر آتے تاریخی خراج ریفنڈ کرے۔ اوپارے کہ دا ریفنڈ بیرہ صنعتکار آتیکن مفک دا اسہ مزور اسے کن ہم مریک انتئے کہ ہراتم صنعت کار ءِ ریفنڈ ملیپک و کمپنی نسخان اٹ کاہک تو بے روزگار اسہ مزور اس مریک۔ اوپارے کہ حکومت بجلی نا ودکی یونٹ نا 50 درسد انڈسری ءِ رعایت تس و پوسکن آ بجلی آ ہم رعایت تس ہرادے او ودکی آن بیدس کاریم اٹ اتیرہ۔ اوپارے کہ مسلم لیگ نا حکومت اٹ 25 درسد کبین بجلی نا معاہدہ نا سوب آن اینو نن بھارت و بنگلہ دیش آن 25 درسد کبین بجلی تینا صنعت آتے تننگ اُن۔ ہراتم بجلی کبین مس تو اونا پروڈکشن نا خڑچ آک ہم زیات مریرہ ہنداخاطرآن وزیراعظم ودکی بجلی 50 درسد اڑزآن کرے ہراڑآن صنعتی حالیت آک داسہ گچینی نا کنڈآ ہِننگ ءُ۔ اوپارے کہ بیرہ فیصل آباد اٹی 50 لکھ پاور لومز بندئسر ہرافتے کوڑی تا بہا آ سودا کننگاکہ اینو او 50 لکھ لومز بحال ہم مسنو و چلینگ انگ ءُ ہم بلکن 30 ہزار پوسکن ءُ پاور لومز نا ہم آرڈرمسنے ہرافتیان گڑاس پاکستان آ سرمسنو و گڑاس سرمننگ ءُ ہراڑآن چار پنچ لکھ بندغ نا روزگار نا بست وبند مسنے۔ اوپارے کہ مسہ ہفتہ مست چیمبر آف کامرس نا چیئرمین و ایلو بندغ آتا کنڈآن پاننگاکہ فیصل آباد لومز 2لکھ لیبر آتا قلت ءِ سگنگ ءِ۔ اوپارے کہ داسہ پیدوار ودنگ ءِ ہراڑآن ہمو صنعت کار خواجہ غاک ہرا تینا کمپنی تے پیشن نا ملک آتیا دریسر داسہ پدی بننگ ءُ۔ خاص گام گیج آتا سوب ٹیکسٹائل نا بشخ پورو بحال مسنے۔ اوپارے کہ ساڑی حکومت برآمد آتیٹی ودکی کن خصوصی پیکج تس، حکومت نان ٹیکسس ریونیو ءِ 427 ارب آن ودفسا 1524 ارب روپئی جمع کننگ بناکرے ہرابھاز انگا جاگہ غاتیا کاریم اٹ اتنگ مریک۔ اوپارے کہ وزیراعلیٰ پنجاب عثمان بزدار درو پڑو کرے کہ دسمبر 2021 اسکان پنجاب نا ہر بندغ ءِ ہیلتھ کیئر ملک۔ زرمبادلہ نا کوڑی تا ہیت ءِ کین تو اللہ نا فضل و کرم اٹ 20 ارب نا زرمبادلہ نا کوڑی ءُ، اسٹاک ایکسچینج نا ہیت ءِ کین تو اینخو سال اٹی مچ آ دنیا ٹی ترندی نا لحاظ اٹ ارٹ میکو نمبر و ایشیاٹی ترندی نا لحاظ اٹ اولیکو نمبر آٹے۔
