اسلام آباد۔ 08 دسمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ کورونا دین انا ارٹ میکو ریسہ ترندی اٹ تالان مننگ ءِ، تدوک آ 24 گھنٹہ ٹی 89 مرک ریکارڈ کننگا ہراکہ تدوک آ وخت اٹ غٹ آن زیات ءُ۔ نیشنل کمانڈ اینڈآپریشن سینٹر(این سی او سی) ٹی میڈیا تون گپ وتران کرسا اوپارے کہ کورونا نا ارٹمیکو ریسہ تدوک آ ریسہ غان بھاز زیات ہلوک ءِ۔ داڑآن ننا زرگزران، تعلیم و جان جوڑی نا خیالداری بھاز بے وڑ زہمی مننگ کیک۔ اوپارے کہ ارٹ میکو ریسہ انفرادی و اجتماعی وڑاٹ ننا زند ءِ زہمی کرے۔ اولیکو ریسہ ٹی سائنسی وڑ و وڑوڈول آتے اٹ کورونا دین انا اولیکو ریسہ نا مون ءِ توننگ اٹ کمک رسینگا۔ خصوصی کمکار پارے کہ نن این سی او سی نا پلیٹ فارم آن غٹ اسٹیک ہولڈر آتیان کورونا ایس او پی تیا عمل نا خواست کینہ۔ پیشن پیش تمنگ نا وخت آ ماسک بینر، رش والا جاگہ غاتیان پاناد کیر، دوتے سلر، و راجی فاصلہ ءِ پک کیر۔ ڈاکٹر فیصل سلطان غٹ محکمہ غاتیان خواست کرے کہ او تینا عملہ و دفترآتیٹی ایس او پی تے پک کیر۔ اگہ نن دا پارت آتیا عمل کینہ تو ہراوڑاٹ نن اولیکو ریسہ نا مون ءِ توریسن ہمووڑ ہی نن ارٹ میکو ریسہ نا تالانی ءِ کم کننگ اٹ سرسہب مننگ کینہ۔
