اسلام آباد۔ 08 دسمبر (اے پی پی) چیئرمین سینیٹ محمد صادق سنجرانی پارینے کہ ہڑتوم آ ملک آتا دوستانہ تعلقداری ڈیہہ نا زرگزرانی و راجی شونداری نا پوسکن ءُ کنڈ اس متعین کننگ ءِ، پاکستان چین اتون تینا بے مٹ و دیرینہ سنگتی آ گمر کیک۔ داخیال آتا درشانی ءِ او پاکستان اٹی چین نا سفیر نونگ رونگ تون گپ وتران کرسا کرے ہرا سے شنبےنا دے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری و تین پہ تینی است خواہی نا باندات آ گپ وتران کننگا۔ اوڑدہی ٹی چیئرمین سینیٹ صادق سنجرانی پارے کہ ہڑتوم آ ملک آتا دوستانہ تعلقداری ڈیہہ نا زرگزرانی و راجی شونداری نا پوسکن ءُ کنڈ اس متعین کننگ ءِ۔ پاکستان چین اتون بے مٹ و دیرینہ سنگتی آ گمر کیک۔ اوپارے کہ پارلیمانی ڈل آتا ہن و بر آن تین پہ تینی سیاسی و راجی و زرگزرانی تعلقداری تیٹی پین ودکی مسنے۔ پارلیمانی سفارتکاری اہم ہڑتوم آ کنڈآتا رابطہ غاتے سوگو کننگ اٹ گچین کڑد ادا کیک۔ ہڑتوم آ ملک آتا نیام اٹ ادارہ جاتی کمکاری ءِ پین مون آ دننگ نا گرجءِ۔ چیئرمین سینیٹ پارے کہ السی رابطہ غاتا مون آ دننگ آن زرگزرانی شریداری پین سوگو مریک۔ سی پیک علاقائی شونداری نا اسیجائی وژن نا بھرم ءِ۔ سی پیک نئے بیرہ ڈیہہ بلکن علاقائی شونہالی و شونداری و شونہالی نا نوید اس اتیک بریک۔ داوخت آ چین نا سفیر نونگ رونگ اسیجا شونداری و مربوط رابطہ غاتا بابت چیئرمین سینیٹ نا خیال آتا ستاءِ کرے۔ اوپارے کہ پاکستان چین اکن بھاز اہم ملک اسے و علاقی شونداری کن ننا جہد اسیجاءِ۔ ہڑتوم آ ملک آتا شونداری و شونہالی نا وژن و سی پیک نا ڈٹ آن دا ڈیہہ جہانی واپار نا مرکز مریک۔
