اسلام آباد۔ 08 دسمبر (اے پی پی) اسپیکر قومی اسمبلی اسد قیصر پارینے کہ سی پیک ملکی شونداری و شونہالی نا ڈٹ ءِ، خیبرپختونخوا ٹی سی پیک نا رداٹ برجا ڈٹ آتا وخت آ پوروی وخت انا اہم گرج ءِ، سی پیک ڈٹ آتا پوروی آن صوبہ ٹی شونداری و شونہالی نا پوسکن آ دور بناکیک۔ داخیال آتا درشانیءِ او سی پیک اتھارٹی نا چیئرمین لیفٹیننٹ جنرل (ر) عاصم سلیم باجوہ تون گپ وتران کرسا کرے ہرا سے شنبے نادے آ داڑے اوڑتون اوڑدہی کرے۔ اوڑدہی ٹی سی پیک نا رداٹ خیبرپختونخوا ٹی برجا شونداری ڈٹ آتیا سرجم گپ وتران کننگا۔ اوڑدہی ٹی اسپیکر قومی اسمبلی پارے کہ سی پیک ملکی شونداری و شونہالی نا ڈٹ ءِ۔ خیبرپختونخواٹی سی پیک نا رداٹ برجا ڈٹ آتا وخت آ تفنگ وخت انا اہم گرج ءِ۔ اوپارے کہ سی پیک ڈٹ آتا پوروی آن صوبہ ٹی شونداری و شونہالی نا پوسکن آ دور بناکیک۔ رشکئی اکنامک زون آن علاقہ ٹی الس کن روزگار نا پوسکن ءُ وارخواہی ودی مریک۔ اسد قیصر پارے کہ اکنامک زون و سی پیک آن کاروباری وارخواہی فراوان مریک۔ سی پیک آن واپار تون سفیر آسراتی ہم دُوبریک۔ اسپیکر اسد قیصر سی پیک نا کارکڑد انا ستاءِ کرے۔ داوخت آ سی پیک اتھارٹی نا چیئرمین عاصم سلیم باجوہ اسپیکر ءِ سی پیک نا رداٹ برجا ڈٹ خاص وڑاٹ خیبرپختونخوا ٹی برجاڈٹ آتا سرجم آتیان معلومدار کرے۔ عاصم سلیم باجوہ پارے کہ رشکئی اکنامک زون نا بناءِ زوت کننگک۔ ڈیرہ اسماعیل خان موٹروے و سی پیک نا ایلو ڈٹ آتیا زوت کاریم پورو مریک۔
